Partekatu edukia
Euskara
Gaia: La escasez de plazas en euskera en las escuelas infantiles de Pamplona/Iruña (ciclo 0-3 años).
Euskera
Kontseilari jauna:
1. 2021eko otsailaren 4an, instituzio honek idazki bat jaso zuen. Hizkuntza Eskubideen, Behatokiarena, bertan Iruñeko Udalaren kontra kexa bat planteatzen zuen udaleko haur eskoletan (0-3 urte zikloan) euskarazko plazen eskaintzagatik..
2. Ondoren, erakunde honek Iruñeko Udaletxera, Hezkuntza Departamentura eta Eskubide Sozialetako Departamentura jo zuen, gai horri buruzko informazio eske.
2021eko otsailaren 19an, martxoaren 12an eta martxoaren 30ean txostenak jaso ziren, txosten horien kopia bat interesdunari helarazi zaio.
3. Euskararen Foru Legeak helburu nagusien artean honakoa jasotzen du: “euskararen erabilera eta irakaskuntza bermatzea, borondatezkotasun, mailakatze eta begirune irizpideei jarraiki eta Nafarroako errealitate soziolinguistikoaren arabera” [1.2 artikulua, c) hizkia].
Helburu horren harira, aipatutako foru legearen 19. artikuluak aitortzen du herritar guztiek dutela “hezkuntza maila desberdinetan irakaskuntza euskaraz eta gaztelaniaz izateko eskubidea, ondoko kapituluetan ezarritako eran”.
Eta, azken aurreikuspena zehazte aldera, 25. artikuluak, Iruña barne hartzen duen eremu mistoko irakaskuntzari dagokiona, honakoa ezartzen du:
1. “Euskara irakaskuntzan sartuko da pixkana-pixkanaka, progresiboki eta behar adina, ikastetxeetan euskarazko irakaskuntza duten lerroak sortuz, hala eskatzen dutenendako.
2. Hezkuntza maila ez-unibertsitarioetan euskara ikasketak emanen zaizkie hala nahi duten ikasleei, oinarrizko eskolatzearen bukaeran euskararen jakintza nahikoa izan dezaten.
4. Aipatutako lege-arauek adierazten duten gisan, eremu mistoko Administrazio publikoari dagokio eskaintzea euskararen irakaskuntza, euskarazko eskolatzea nahi duten interesdunen eskariari erantzunez; betiere, ikastetxeetan behar bezala gaituz eskolako lerroak edo plazak.
Lerroen edo plazen lurralde-antolaketari dagokionez, lehenagoko kexa-espedientetan adierazi bezala, institutu honen ustez bereziki garrantzitsua da 0-3 urteko haur-eskolen zerbitzuen hurbiltasuna bermatzea Iruña bezalako udalerri batean. Kontuan hartuta, noski, Iruñak hainbat auzo dituela eta oinarrizko zerbitzuen hornidura deszentralizatua dagoela (gizarte-zerbitzuak, osasun-zerbitzuak, eskola-zerbitzuak eta abar, administrazio-titulartasuna edozein dela ere).
Hori ikusita eta kontuan hartuta jasotako txostenetan adierazten diren administrazioaren eskumenak haur-eskolen plangintzarako eta kudeaketarako, komenigarritzat jotzen da iradokizun bat egitea Iruñako Udalari, Hezkuntza Sailari eta Gizarte Eskubideen Sailari. Hots, iradokitzen da, beharrezko koordinazioaren eta lankidetzaren bidez, uneoro berma dezaten euskarazko irakaskuntzaren eskaintza 0-3 urteko haur-eskola publikoetan eta eskolak kokatu daitezen Iruñan nahiz bete dezaten hurbiltasunaren printzipioa, interesdunen eskaria betez.
5. Beraz, eta Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.1. artikuluak ematen dizkion eskumenen arabera, hau jo du beharrezkotzat:
Iradoki nahi zaie Iruñako Udalari, Hezkuntza Sailari eta Gizarte Eskubideen Sailari, beharrezko koordinazioaren eta lankidetzaren bidez, uneoro berma dezaten euskarazko irakaskuntzaren eskaintza 0-3 urteko haur-eskola publikoetan eta eskolak kokatu daitezen Iruñan nahiz bete dezaten hurbiltasunaren printzipioa, interesdunen eskaria betez.
Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.2. artikuluari jarraikiz, eta aginduzkoa betez, Iruñeko Udalak, Hezkuntza Departamentuak eta Eskubide Sozialeko Departamentuak bi hileko epean jakinarazi beharko dute ebazpen hau onartzen duten eta, dagokionean, hura betetzeko zer neurri hartu dituzen.
Lege-agindu horretan xedatzen denez, aipatutako administrazio publikoak arartekoaren erabakia onartzen ez badu, erakunde honek erabaki dezake gai hori 2021. urteari dagokion urteko txostenean sartzea eta Nafarroako Parlamentuan azaltzea, jarrera hori izan duen administrazio publikoa berariaz aipatuz, baldin eta arartekoaren iritziz erabakia onartzea posible bazen.
Adeitasunez, zure erantzunaren zain,
El Defensor del Pueblo de Navarra
Nafarroako Arartekoa
Francisco Javier Enériz Olaechea
Partekatu edukia