Ebazpenak

Abenduaren 11ko 250/2009 Ebazpena, Nafarroako Arartekoarena, [?] jaunak aurkeztutako kexari buruzkoa.

Función Pública

Gaia: No le abonan los atrasos correspondiente al complemento de destino a los que tiene derecho por resolución judicial

Exp: 09/746/F

Nº: 250

Funtzio Publikoa

AURREKARIAK

1. 2009ko urriaren 29an, [?] jaunak aurkeztutako idazki bat sartu zen erakunde honetan. Haren bidez, kexa bat agertzen zuen Nafarroako Gobernuko Osasun Departamentuaren aurka, zor zaizkion zenbatekoak ordaintzen ez zaizkiolako.

   Azaltzen zuenez, Osasunbidea-Nafarroako Osasun Zerbitzuko Giza Baliabideen zuzendariaren azaroaren 7ko 2695/2008 ebazpen bidez onartu zitzaion destinoko osagarria eta horren atzeraeraginezko ondorioak aitortzeko erreklamazioa.

   Zioenez, oraindik ere, eginiko erreklamazioak gorabehera, ez zaizkio ordaindu atzerapenak, zeinak, ebazpenaren arabera, kontusail jakin batzuei esleitu baitziren.

2. Kexa horri buruz ebazpen egokia emateko eta Nafarroako Arartekoari buruzko uztailaren 3ko 4/2000 Foru Legean erakunde honi emaniko ahalmenez baliatuz jarduteko zein aukera dauzkagun zehazteko, Osasun Departamentuari idazki bat igorri genion, kexan planteaturiko gaiari buruz informazioa eman zezan.
3. Kontseilariak, joan den azaroaren 18an, txosten bat igorri zuen. Hartan, ondokoa dio, hitzez hitz:
   • Eskabideak eta erreklamazioak arian-arian ari zaizkio ordaintzen, erregistroan duten hurrenkerari jarraikiz eta ditugun lan-zamekin bat.
   • Gisa horretako espedienteak pilatuta ditugunez (4.400 espediente inguru urtebetean), atzerapena gertatu da.
   • Uste dugu 2010aren hasiera aldean ordaindu ahalko diogula [?] jaunari.

AZTERKETA

1. Kexaren sustatzaileak, Nafarroako Gobernuko jarduneko funtzionarioa den aldetik, eskubidea du, Nafarroako administrazio publikoen zerbitzuko langileen Estatutuko 36.1.j) artikuluan ezarritakoaren arabera, dagozkion ordainsariak jasotzeko. Halatan, Osasunbidea-Nafarroako Osasun Zerbitzuko Giza Baliabideen zuzendariaren azaroaren 7ko 2695/2008 ebazpen bidez onartu zitzaion destinoko osagarria eta horren atzeraeraginezko ondorioak aitortzeko erreklamazioa; izan ere, zerbitzua eman zuen B.S.E/laguntzaile gisa, Nafarroako Ospitaleko Neurokirurgiako Zerbitzuari atxikia, erradiazio ionizatzaileen eraginpean egotetik heldu den arriskuarekin.

    

2. Osagarria eta horren atzeraeraginezko ondorioak aitortu zitzaizkionetik, hau da, zorra aitortu zenetik urtebete luze joan delarik, Osasunbidea-Nafarroako Osasun Zerbitzuak, “lan-zama” alegatuta, ez dizkio atzerapenak ordaindu, eta, hortaz, kalte ekonomiko nabarmena eragin dio kexaren sustatzaileari.

   Gogorarazi behar da ezen, Konstituzioko 103.1 artikuluaren arabera, administrazio publikoak jarduera-printzipio duela eraginkortasuna, eta printzipio hori jaso eta positibizatu zela Herri administrazioen araubide juridikoaren eta administrazio prozedura erkidearen azaroaren 26ko 30/1992 Legeko 3.1 artikuluan eta Nafarroako Foru Komunitateko Administrazioari buruzko abenduaren 3ko 15/2004 Foru Legeko 3.2.a) artikuluan. Arau juridiko horrek zeharo galarazten ditu administrazio publikoen jardunik eza nahiz luzamendu bidegabeak, batik bat herritarren interesak baldin badaude jokoan eta uki badaitezke.

   Administrazioaren eraginkortasunaren arau juridikoaren aurrean, Administrazioaren jardunik ezak eta pasibotasunak edo jarduteko luzamendu bidegabeek arau juridiko horren urraketa argia dakar, administrazioaren eraginkortasun eza agerian uzten duen aldetik. Konstituzio Auzitegiaren irailaren 25eko 136/1995 epaiak dio Administrazioaren jarrera ez-aktiboa edo omisiozkoa legez kanpokoa dela eta herritarren eskubide eta interes bidezkoei eragiten diela. Azken finean, aplikatzekoa den ordenamendu juridikoak administrazio publiko guztiei ezartzen die administrazio-prozedurak izapidetzeari zor zaizkion azkartasunez eta eraginkortasunez jardun beharra.

   Aztertzen ari garen kasu honetan argi ikusten dugu luzamendu bidegabea gertatzen dela, eta kexaren sustatzaileak ez du hori zertan jasan. Aztertzen ari garen kasu honetan argi ikusten dugu luzamendu bidegabea gertatzen dela, eta kexaren sustatzaileak ez du hori zertan jasan. Kexaren sustatzaileari zor zaizkion atzerapenak ordaintzen ez diren bitartean, “administrazio egokia izateko” eskubidea urratzen ari da (Nafarroako Foru Komunitateko Administrazioari buruzko abenduaren 3ko 15/2004 Foru Legeko 7. artikulua).

3. Nafarroako Ogasun Publikoari buruzko apirilaren 4ko 13/2007 Foru Legeko 24. artikuluak ezartzen duenez, “Administrazioak Nafarroako Ogasun Publikoaren hartzekodunari ordaintzen ez badio, dagokion ebazpena eman (2008-12-01) edo betebeharra aitortu eta biharamunetik bi hilabeteko epean, hurrengo egunetik hasi eta erabat kitatu arte ordaindu beharko dio foru lege honen 18. artikuluko 2. idatz-zatian adierazitako interesa, zorpeko kopuruaren gainean”.
   Azken batean, Osasunbidea/Nafarroako Osasun Zerbitzua behartuta dago legez aitortutako zorra gehi dagozkion interesak ordaintzera kexaren sustatzaileari.

 

Aurreko guztia dela eta, erakunde hau arautzen duen foru legeko 34.1 artikuluan ezarritakoari jarraituz

 

EBATZI DUT:

 

1. Nafarroako Gobernuko Osasun Departamentuari gogoraraztea behartuta dagoela legez dagozkion ordainsari guztiak gehi ez ordaintzetik heldu diren interesak ordaintzera kexaren sustatzaileari.

    

2. Bi hilabeteko epea ematea Osasun Departamentuari erakunde honi jakinarazi diezaion gogorarazpen hau onartu duen eta hura dela-eta zer urrats egin behar dituen, edo, bestela, hura ez onartzeko arrazoiak azal diezazkion. Halaber, ohartarazten diot hala egiten ez badu Nafarroako Parlamentuari igorriko diodan urteko txostenean sartuko dudala kasua, aipatu legearen bigarren atalean ezarritako moduan.

    

3. Kexa-egile [?] jaunari eta Osasun Departamentuari ebazpen honen berri ematea, eta adieraztea ezin dela honen kontrako errekurtsorik jarri.

 

Nafarroako Arartekoa

 

Francisco Javier Enériz Olaechea