Urtarrilaren 12ko 5/2010 Ebazpena, Nafarroako Arartekoarena, [?] jaunak eta [?] andreak aurkeztutako kexari buruzkoa.

2010 urtarrila 12

Hezkuntza eta Irakaskuntza

Gaia: Transmision de datos de un alumno por parte del centro escolar

Exp: 09/723/E

Nº: 5

Hezkuntza eta irakaskuntza

AURREKARIAK

2009ko urriaren 21ean, [?] jaunak eta [?] andreak aurkeztutako idazki bat sartu zen erakunde honetan. Haren bidez, kexa bat agertzen du ikastetxe baten ([?] ikastetxea) jokabidearengatik.
Interesdunek azaltzen dute orain dela bi urte inguru gorabehera bat izan zutela ikastetxeko beste ikasle baten aita batekin, ikastetxetik hurbil dagoen oinezkoentzako pasabide batean. Dirudienez, gorabehera horrek, azkenean, prozedura judizial bat ekarri du.
Adierazten dute gorabehera horren ondotik, pertsona horrek ikastetxera jo zuela, kexa-egileen semeari buruzko datuak eskuratzeko, hain zuzen ere gurasoak identifikatzeko xedez.
Kexa-egileek baieztatzen dutenaren arabera, ikastetxeak, beren ustez zuzengabeki eta adingabearen intimitateari eraso eginez, pertsona horri bidea eman zion semearen argazkia eta datuak eskuratzeko.
Kexa aztertuta, erakunde honek zehazki esku hartzeko zer aukera zituen jakiteko, erakunde hau bera arautzen duen uztailaren 3ko 4/2000 Foru Legeak ezarritakoari jarraiki, azaldutako gaiari buruzko txosten bat eskatu genion Hezkuntza Departamentuari.

Eskatutako txostena jaso ondoren, honakoa ageri dela atzeman dugu:

“2009ko azaroaren 9an, izenpetzen duen ikuskatzaileak Arartekoaren 09/723/E espedienteari buruzko idazkia jaso zuen; bertan, informazioa eskatzen du “[?]” zentroaren jarduerari buruz, hain zuzen ere [?] jaunak eta [?] andreak erakunde horretan aurkeztutako kexari dagokionez.

2009ko azaroaren 9an, ikuskatzaileak ikastetxeko zuzendari akademiko [?] jaunari eskatu zion idatziz informatzeko ikastetxearen jokabideari buruz.

2009ko azaroaren 11n, Hezkuntza Ikuskapenaren Zerbitzuan ikastetxeko zuzendari akademiko [?] jaunaren erantzuna jaso zen. Honakoa azaltzen zuen, izan ere:

2009ko ekainaren 17an, nire bulegoan [?] eta [?] hartu nituen, ikastetxeko bi ikasleren gurasoak eta Berriozarko bizilagunak.
Guraso horiek kontatu zizkidaten egun batean [?]-k andre batekin eta haren semearekin ika-mika bat –hain zuzen ere oinezkoentzako semaforoa gorri zegoela kalea zeharkatzeagatik– izan ondotik gertatutakoak, harik eta jite bereko beste egitate batzuen ondorioz beste eztabaida bat sortu zen arte, oraingoan andre horren senarrarekin eta andrearekin berarekin, gure ikastetxearen atarian, 2009ko ekainaren 12an, ostiralez.
[?]-en eta [?]-en asmoa zela alde batetik ikastetxeko zuzendaritzari informazioa ematea gertatutakoei buruz eta aurrekariei buruz eta, bestetik, egiaztatzea ea beste bikote hori ikastetxeko ikasle baten gurasoak ote ziren.
Gurasoek adierazitako ezaugarri fisikoekin, ezinezkoa izan zela egiaztatzea ikastetxeko gurasoak ziren ala ez; hala eta guztiz ere, [?]-k uste zuen bikotearen semearen argazki bat ikusiz gero identifikatu eginen zuela, behin baino gehiagotan ikusia baitzuen.
Semearen gutxi gorabeherako adinarengatik, [?]-k adierazitakoaren arabera, kalkulatu genuen DBHko 1. edo 2. maila ikasten ariko zela, eta ikastetxeko webgunean begiratu genuela, bertan gure ikasleek egiten zituzten jarduera, irteera eta abarren argazkiak jartzen baitira. Argazki horiek gurasoek ikus ditzakete.
Argazkiak ikusten ari ginen bitartean, ikaslea identifikatzea lortu zuela: ikaslea [?] da, DBHko 1. mailakoa.
Ikaslearen izena eta ikastetxean matrikulatuta zegoela jakitera emateaz gainera, ikastetxeko zuzendaritza honek ez du bestelako inongo informaziorik eman Carrera Escudero familiari buruz, ez eta haren kideei buruz ere, eta ez dago inon jasota ikastetxe honetako beste inongo bulegotatik ere informaziorik eman denik.

AZTERKETA

Azaldutako aurrekarietatik ondorioztatzen denez, kexa-egileek “[?]” ikastetxearen jokabidea salatzen dute. Ikastetxe hori Foru Komunitateko Administrazioarekin itunduta dago. Kexaren arrazoia da hirugarrenei semeari buruzko informazioa eman zitzaiela, gurasoek horretarako baimenik eman gabe.
Jasotako txostenean adierazitakoa ikusita, egia da ikastetxearen inguruetan ikastetxeko gurasoen artean sortutako gatazka pribatu batean, ikastetxeak kexa-egileen semea identifikatu zuela, argazkiak ikusiz, eta haren izena eman zuela; era berean, jakitera eman zen ikastetxeko ikaslea zela.
Erakunde honek uste du jokabide horrek nabarmen gainditzen duela ikastetxeari dagokion irakaskuntza eginkizuna. Argi dago ikastetxeak ikasleei buruz duen informazioa irakaskuntza-eginkizuna betetzeko xedez ematen dela eta eskatzen dela, eta xede horrexetarako erabili beharko dela.
Ikasleen gurasoen artean, ikastetxearen inguruetan, gatazka bat sortu baldin bazen, logikoa da ukitutakoek egokitzat jotzen dituzten ekintzez baliatu nahi izatea, baina ikastetxearen eginkizunetan ez dira identifikazio jarduerak sartzen, irakaskuntza-jardueraz guztiz kanpokoak baitira.
Horren ondorioz, gure ustez, izaera pertsonaleko datuak babesteari buruzko legeen aurkako informazio-transmisio bat gertatu zen, zeren eta ikasle baten identifikazioa egin baitzen, eta hirugarrenei adingabearen izena eta ikastetxeko ikaslea izateari buruzko informazioa eman baitzitzaien, gurasoek horretarako eman beharreko baimena eman gabe eta,. berriz diogu, irakaskuntza jarduerarekin zerikusirik batera ez duen xede baterako.
Hezkuntza Departamentuaren hezkuntza-ikuskaritzaren antolamendua eta funtzionamendua arautzen dituen ekainaren 30eko 80/2008 Foru Dekretuak, beste eginkizun batzuen artean, honakoa esleitzen dizkio: ikastetxeetan hezkuntza sistemari dagozkion legeak, erregelamenduak eta indarra duten gainerako xedapenak betetzen direla begiratzea eta, hala ez bada, ikastetxe horien jarduna indarra duen arautegiari egokitu dakion eskatzea.
Izaera pertsonaleko datuen babesari buruzko arauak ez dira hezkuntzaren arloko arau berariazkoak, baina, zeharkako arauak direnez, eragina dute ikastetxeetan. Hori dela eta, beharrezkotzat jotzen dugu Administrazioak begira dezan ikastetxeetan arau horiek betetzen direla.
Horri dagokionez, kexa-egileei gogorarazi behar zaie aukera dutela egitatea Datuak Babesteko Espainiako Agentzian salatzeko, zeren eta egitate hori arau-hauste gisa tipifikatuta baitago; izan ere, litekeena da agentzia horrek zehapen administratibo bat ezartzea.
Azaldutakoa dela eta, erakunde honek uste du nahikoa arrazoi badagoela Hezkuntza Departamentuak bere ikuskaritza-eginkizunaz balia dadin, egitateak argitzeko behar den espedientea izapide dezan eta behar diren neurriak har ditzan arau indardunak betetzen direla zaintzeko.

Aurreko guztia dela eta, erakunde hau arautzen duen foru legeko 34.1 artikuluan ezarritakoari jarraituz

EBATZI DUT:

Hezkuntza Departamentuari gomendatzea ikuskaritza-eginkizunaz balia dadin, egitateei buruzko behar den espedientea izapide dezan eta behar diren neurriak har ditzan ikastetxeetan izaera pertsonaleko datuak babesteari buruzko arau indardunak betetzen direla zaintzeko.
Bi hilabeteko epea ematea Hezkuntza Departamentuari gomendio hau onartu duela eta hura dela-eta zer urrats egin behar dituen jakinaraz dezan, edo, bestela, hura ez onartzeko arrazoiak azal ditzan. Halaber, ohartarazten diot hala egiten ez badu Nafarroako Parlamentuari igorriko diodan urteko txostenean sartuko dudala kasua, aipatu legearen bigarren atalean ezarritako moduan.
Kexa-egileei eta Hezkuntza Departamentuari ebazpen honen berri ematea, eta adieraztea ezin dela honen kontrako errekurtsorik jarri.

Nafarroako Arartekoa

Francisco Javier Enériz Olaechea