Partekatu edukia
Ogasuna
Gaia: La reclamación de la Mancomunidad de residuos sólidos urbanos de Bortziriak-Cinco Villas a una sociedad mercantil del pago de las tasas correspondientes al servicio de recogida y tratamiento de residuos sólidos urbanos de los últimos cuatro años.
Bortzirietako Hiri-Hondakinen Mankomunitateko lehendakaria
Lehendakari jauna:
1. 2025eko urtarrilaren 20an, instituzio honek (…) andrearen idazki bat jaso zuen, (…) merkataritza-sozietatearen izenean. Horren bidez, kexa bat aurkeztu zuen azken lau urteetako hiri-hondakin solidoak bildu eta tratatzeko zerbitzuari zegozkion tasak ordaintzeko erreklamazioagatik.
2. Ondoren, erakunde honek Bortzirietako Hiri-Hondakinen Mankomunitatera jo zuen, gai horri buruzko informazio eske.
2025eko otsailaren 13an emandako txostena jaso zen, eta espedienteari erantsi zitzaion.
3. 2024ko urriaren 24ko idazki bat da kexa jartzeko arrazoia. Horren bidez adierazten denez, Berako Udalak emandako dokumentazioaren harira, interesdunak alta eman zuen ekonomia-jardueren gaineko zergan 2005eko otsailaren 25ean, eta, horren ondorioz, eskatzen zaio ordaindu ditzala 2020ko bigarren seihilekotik 2024ko lehenengo seihilekora bitarteko aldiari dagokionez hiri-hondakinak biltzeko eta tratatzeko zerbitzuaren tasak.
4. Mankomunitateko hiri-hondakin solidoak biltzeko eta tratatzeko zerbitzua arautzen duen ordenantza fiskalak (Nafarroako 152. Aldizkari Ofizialean argitaratu zen, 2006ko abenduaren 20an) honako hau ezartzen du:
a) Zerga-egitatea, hau da, tasak ordaintzeko betebeharra eragiten duen egoera, honako honen arabera da: Hiri-hondakinak bildu, garraiatu eta gero aprobetxatu edo desegiteko nahitaezko zerbitzua eskura izan edo/eta erabiltzea, hondakinei buruzko Legeari eta Mankomunitatearen kudeatzeko ordenantzari jarraituz. Kasuak hauek dira (…) b) Merkataritza, zerbitzu eta bulegoak. (4. artikulua).
b) Era berean “merkataritza, zerbitzu eta bulegoei” dagokienez, kasuko tarifa aplikatuko zaio zerga-oinarri honi: “jarduera ekonomikoen gaineko zergan alta duen edo, zerga honen pean ez dagoenean, arian dagoen jarduera bat ezarri edo burutzeko unitatea” (6. artikulua).
Bestalde, Nafarroako Toki Ogasunei buruzko martxoaren 10eko 2/1995 Foru Legeak jasotzen du toki-entitateen aldeko kredituak eta zorrak azkendu egiten direla, beste kasu batzuen artean, preskribatzeagatik (16. artikulua), lau urteren ostean.
Araudi hori kontuan hartuta, interesduna 2005eko otsailaren 25az geroztik ekonomia-jardueren gaineko zergan alta duen merkataritza-sozietate bat denez, ordenantzan ezarritakoaren arabera, zergak ordaintzeko betebeharra izan du data horretatik.
Hala ere, Mankomunitateak ez zuenez inguruabar horren berri izan Berako Udalak berriki jakinarazi zion arte, Mankomunitateak ezin du eskatu 2005eko otsailaren 25etik sortutako tasa guztiak ordaintzeko, baina aukera dauka eskatzeko nahiz eta sortu oraindik preskribatu ez duten tasak ordaintzeko.
Hori dela-eta, erakunde honek ez du arrazoirik topatu egindako errekerimendua auzitan jartzeko.
5. Alabaina, ikuspegi ez-formal batetik, erakunde honi harrigarria iruditzen zaio ezen, 2005. urtetik 2024. urtera bitarte, behar bezalako koordinaziorik ez egotea Berako Udalaren eta Mankomunitatearen artean interesdunaren datuei dagokienez; izan ere, horren ondorioz, halabeharrez aipatutako administrazioei egotzi behar zaien akats batengatik, orain bat-batean erreklamatu diote ordainketa bakar batean egin dezala seihilekoko zortzi ordainketatan egin behar zuena.
Horren harira, gogorarazi behar da Konstituzioaren 103.1 artikuluak koordinazioaren printzipioa ezartzen duela berariaz administrazio publikoen jarduketaren printzipio gidari gisa.
Horrenbestez, administrazio honek Mankomunitateari gogorarazi nahi dio lege-betebeharra duela koordinazioaren printzipioaren arabera jarduteko, eta, halaber, iradoki nahi dio interesdunari aukera eman diezaiola erreklamatutako zenbatekoen ordainketa zatikatzeko, halako moldez non Berako Udalaren eta Mankomunitatearen arteko koordinazio-akatsak ahalik kalte gutxien eragiten dion.
6. Beraz, eta Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.1. artikuluak ematen dizkion eskumenen arabera, hau jo du beharrezkotzat:
a) Bortziriak Hiri Hondakin Solidoen Mankomunitateari gogoraraztea legez jardun behar duela koordinazioaren printzipioaren arabera berori osatzen duten toki-entitateekin.
b) Bortziriak Hiri Hondakin Solidoen Mankomunitateari iradokitzea ezen, gatazka eragin duen errekerimendua administrazioaren akats baten ondorioz sortu denez, interesdunari aukera eman diezaiola erreklamatutako zenbatekoen ordainketa zatikatzeko.
Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.2. artikuluari jarraikiz, eta aginduzkoa betez, Bortzirietako Hiri-Hondakinen Mankomunitateak bi hileko epean jakinarazi beharko du ebazpen hau onartzen duen eta, dagokionean, hura betetzeko zer neurri hartu dituen.
Lege-agindu horretan xedatzen denez, aipatutako administrazio publikoak arartekoaren erabakia onartzen ez badu, erakunde honek erabaki dezake gai hori dagokion urteko txostenean sartzea eta Nafarroako Parlamentuan azaltzea, jarrera hori izan duen administrazio publikoa berariaz aipatuz, baldin eta arartekoaren iritziz erabakia onartzea posible bazen.
Adeitasunez, zure erantzunaren zain,
El Defensor del Pueblo de Navarra
Nafarroako Arartekoa
Patxi Vera Donazar
Partekatu edukia