Partekatu edukia
Trafikoa eta bide-segurtasuna
Gaia: La falta de contestación del Ayuntamiento de Bera a unos escritos presentados por la autora de la queja relacionados con una multa de tráfico.
Berako alkatea
Alkate jauna:
1. 2025eko urtarrilaren 9an, instituzio honek (…) andrearen idazki bat jaso zuen, zeinaren bidez kexa bat aurkeztu zuen jakinarazi gabeko isun baten ondorioz enbargatu zitzaiolako eta egindako idatziei ez erantzuteagatik
Idazki hartan, hauxe zioen:
a) 2024ko irailaren 26an banku-kontuan 110 euroko enbargoa egin zitzaiola ohartu zen.
b) Berako Udalarekin harremanetan jarri zen eta jakinarazi zitzaion enbargoa 2023ko irailean bidegabe aparkatzeagatik jarritako isunaren ondorio zela.
c) Interesduna Hendaian bizi da.
d) Isunaren xede den ibilgailua Frantzian matrikulatuta eta aseguratuta dago.
e) Enbargoaren berri jaso arte ez zuen isunaren berri izan, ez baitzitzaion Hendaiako bere helbidean jakinarazi.
f) Gertatutakoa kontuan hartuta, idazki bat aurkeztu zuen Berako Udalean. Idazki horretan azaltzen zuen bere bizilekuan ez zuela jakinarazpenik jaso eta, beraz, ez zela legea bete.
g) Udalaren erantzunik jaso ez zuenez, bigarren idazki bat aurkeztu zuen zehapen-espedientearen datuak eskatzeko, eta horri ere ez zaio erantzunik eman.
2. Ondoren, erakunde honek Berako Udalera jo zuen, gai horri buruzko informazio eske.
2025eko otsailaren 4an, emandako txostena jaso zen, honako hau adieraziz:
- 2023ko irailaren 14an, 001 zenbakiko agenteak trafiko-isuna (1209. buletina) jarri zion EQ448GV ibilgailuari.
- Ibilgailuak matrikula frantsesa du eta ez dago jasota Udaleko ibilgailuen erroldan.
- 2023ko urriaren 19an, salaketa- jakinarazpena bidali zen Kanttonaundi karrika 4/B – 31780 Bera helbidera, helbide hori Berako Udalaren Mantenimendu Orokorren programan jasota baitzegoen (bertan erregistratzen dira Udalak harremana duen pertsona eta erakundeei buruzko datuak).
- 2023ko azaroaren 8an, Korreosetik jakinarazpena itzulketa jaso zen, bi aldiz saiatu ondoren, non jasotzen baita gutunaren hartzailea ez zegoela
- 2024ko otsailaren 6an, EAOn argitaratu zen EQ448GV ibilgailuari buruzko salaketaren jakinarazpena, ezin izan zelako salaketa jakinarazi.
- Isuna borondatezko epean ordaindu ez zenez, 2024ko apirilaren 17an bidali zitzaion GESERLOCAL, S.L.enpresari (premiamendu-aldian Berako Udalaren zorrak kobratzendituen enpresari).
- 2024ko apirilaren 24an premiamendu- probidentzia eman zen, isunaren zenbatekoa betearazpen-bidean erreklamatzeko (2023/2030 udal-espedientea). Premiamendu- probidentzia hori ediktu bidez jakinarazten da, 2024ko ekainaren 19ko Nafarroako Aldizkari Ofizialaren bidez, bi aldiz saiatu baitziren jakinarazpena egiten, eta interesduna ez zen agertu banaketa-orduetan.
- 2024ko abuztuaren 5ean, enbargo- probidentzia eman zen.
- 236145/2024 bahitura-eginbidea eman da, banku-kontuan eta ondasunen enbargoan jarritako diruari buruzkoa, 2024ko irailaren 2koa, 110,00 eurokoa. Enbargo-eginbide hori 2024ko azaroaren 2an jakinarazi zitzaion interesdunari, Nafarroako Aldizkari Ofizialean argitaratuta, bi aldiz saiatu baitziren jakinarazpena egiten, eta interesduna ez zen agertu banaketa-orduetan.
- 2024ko irailaren 10ean, isunaren titularrak erreklamazio-idazki bat aurkeztu zuen (sarrera-erregistroko zk.: 2024/2005), ibilgailua aparkatzeko arrazoiak alegatuz, eta isunaren jakinarazpenik jaso ez zuela eta gaur egun Frantzian duela helbidea adieraziz. Enbargoaren baliogabetzea eskatu zuen, titularraren arabera jakinarazpena Frantziako bere helbidera bidali behar zelako, bertan bizi baita gaur egun.
- 2024ko irailaren 26an, isuna kobratzeko dirua betearazpen-bidetik sartu zuen Agentziak.
- 2024ko urriaren 17an, beste erreklamazio- idazki bat aurkeztu zuen (sarrera-erregistroko zk.: 2024/2302), aurreko erreklamazioari erantzunik eman ez zaiola adieraziz, eta espedientearen kopia eskatu zuen.
- 2024ko azaroaren 28an espedientearen eta bertan egindako jardueren kopia eman zitzaion.
3. Bidalitako txostenaren edukia kontuan hartuta erakunde honek bidezkotzat jo zuen interesdunari txostena helaraztea, egoki iritzitako alegazioak formula zitzan.
Alegazio horiek 2025eko otsailaren 17an jaso ziren, eta, interesdunak funtsean, kexa-idazkian adierazitakoa errepikatzen du.
4. Jasota geratu denez, kexan bi gai planteatzen dira: batetik, ibilgailu bat modu irregularrean aparkatzeagatik jarritako salaketa baten ustezko jakinarazpen irregularrari buruzkoa; eta, bestetik, aurkeztu dituen idazki batzuei erantzunik ez emateari buruzkoa.
5. Lehenengo gaiari dagokionez, erakunde honek ez du egokitzat jotzen lege-betebeharrei buruzko gomendio, iradokizun edo gogorarazpenik egitea.
6. Bigarren gaiari dagokionez, aipatzekoa da Administrazio Publikoen Administrazio Prozedura Erkidearen urriaren 1eko 39/2015 Legearen 21.1 artikuluak ezartzen duela administrazio publikoen betebeharra dela “ebazpen espresua eman eta jakinaraztera prozedura guztietan, edozein dela ere prozedura hasteko modua”.
Ebazpen- eta jakinarazpen-betebehar hori egin behar den denbora-koordenatuei dagokienez, artikulu bereko 2. atalak honakoa ezartzen du “ebazpen espresua jakinarazteko gehieneko epea, dagokion prozedura arautzen duen arauan zehaztutakoa izango da.” Eta, era berean, 3. atalean honakoa gehitzen du, “prozedurei dagozkien arauetan ezarrita ez badago, hiru hilabete izango da gehieneko epea”.
Nafarroako Toki Administrazioari buruzko uztailaren 2ko 6/1990 Foru Legearen 318. artikuluak termino berberak ezartzen ditu.
7. Aztergai dugun kasu honetan, espedientean jasota dagoen informaziotik ondorioztatzen denez, isunaren berri izatean interesdunak idazki batzuk aurkeztu zituen Berako Udalean, salaketa eta ondorengo jarduerak behar bezala jakinarazi gabe zeudela alegatuz.
Interesdunak adierazten du idazki horiei ez zaiela berariaz eta arrazoituta erantzun, eta Udalak ez du hori ukatzen bere txostenean. Erakunde horrek, aitzitik, adierazten du interesdunak 2024ko azaroaren 28an, hau da, informazio publikoa eskuratzeko eskaerei erantzuteko Gardentasunari, informazio publikoa eskuratzeko bideari eta gobernu onari buruzko maiatzaren 17ko 5/2018 Foru Legearen 41. artikuluak oro har ezartzen duen hilabeteko epea gaindituta, aurkeztu zuen informazio publikoa eskuratzeko eskaera bati erantzun ziola.
Erakunde honen iritziz, interesdunak aurkeztutako idazkiei eman nahi zaien kalifikazio juridikoa dena delakoa izanda ere, Administrazioak berariaz eta arrazoituta erantzun behar die idazkiei, legez aurreikusitako epearen barruan eta, erantzuteko epe espezifikorik ez badago, hiru hilabeteko epean.
Horregatik, erakunde honek egokitzat jotzen du Berako Udalari gogoraraztea herritarren idazkiei eta informazio publikoa eskuratzeko eskaerei garaiz eta behar bezala erantzuteko legezko betebeharra duela.
8. Beraz, eta Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.1. artikuluak ematen dizkion eskumenen arabera, hau jo du beharrezkotzat:
Berako Udalari gogoraraztea herritarren idazkiei eta informazio publikoa eskuratzeko eskaerei garaiz eta behar bezala erantzuteko legezko betebeharra duela.
Erakunde honek, aipatutako Foru Legearen 34.2 artikuluaren ondorioetarako, onartutzat jotzen duen adierazpen honen bidez, amaiera ematen zaio gai honetan esku hartzeari, eta kexaren egileari ere jakinarazten zaio.
Hala ere, horri buruzko oharren bat egin nahi badu edo ez duela onartzen adierazi nahi badu, gehienez ere bi hilabeteko epean egin dezake, 34.2 artikuluan aipatzen den epean, eta bertan adierazten da kasua dagokion urteko txostenean sartuko dela.
Adeitasunez,
El Defensor del Pueblo de Navarra
Nafarroako Arartekoa
Patxi Vera Donazar
Partekatu edukia