Ebazpenak

Larraungo alkatea

Alkate jauna:

1. 2024ko maiatzaren 22an, instituzio honek (…) andrearen idazki bat jaso zuen. Horren bidez, kexa bat aurkeztu zuen lehen okupazioko lizentzia-eskaera bati ez erantzuteagatik.

2. Ondoren, erakunde honek Larraungo Udalera jo zuen, gai horri buruzko informazio eske.

2024ko abuztuaren 23an, emandako txostena jaso zen, eta espedienteari erantsi zitzaion.

3. Espedientean dagoen informazioa ikusita, hau ondorioztatu daiteke:

a) 2005ean, interesdunak Albiasuko higiezin baten berreraikuntza-obrak sustatu zituen.

b) Larraungo Haraneko Udaleko alkatearen uztailaren 11ko 68/2005 Ebazpenaren bidez, adostu zen Albiasuko Udalaren aldeko txostena egitea, obra horiek egiteko lizentzia emateko.

c) 68/2005 Ebazpenean ezarri zenez, behin obrak amaituta, 2009ko ekainaren 29an, lehen erabilerako lizentzia eskatu zuen.

d) 2010eko martxoaren 30ean, udaleko arkitektoak txosten bat bidali zuen, honakoa esanez:

“Aurkeztutako dokumentazioa ikusita, eta eraikina jabeekin bisitatu ostean, hau jakinarazten da:

a) Aurkeztutako obra-amaieraren dokumentazioari dagokionez:

• Aurkeztutako dokumentazio grafikoak egindako obra islatzen du.
• Ez da aurkeztu obra guztien azken likidazioa. Erantsitako aurrekontua eraikinaren ondoko lur-berdinketari eta lurren euste-hormari dagokion etxebizitzari erantsitako obrei dagokie soilik.

b) Egindako obraren hirigintza-araudia betetzeari dagokionez, hau jakinarazten da:

Eraikinaren iparraldean bi euste-horma egin dira, eraikinaren ipar-ekialdeko eta ipar-mendebaldeko fatxadekiko paraleloak (L bat osatuz). Horma horiek zabaldegi bat uzten dute beheko solairuaren mailan, 8m x 15,55 m-ko azalerakoa gutxi gorabehera (patio ingeles gisa), eta lehen kontra-lursail gisa zeuden fatxadak ere askatuta. Hormak partzelen arteko mugan eraiki dira, eta 2,50 metrotik gorako altuera dute hedaduraren zatirik handienean, eta 3,75 m-ko altuerara iristen dira hormen elkargunean. Esku-hartze horrek ez du betetzen udalaren plana. Gai horri buruz, sinatzen duenak beste batzuetan ere eman dio horren berri udalari.

Kanpoko arotzeriak aluminiozkoak dira, eta akabera zuraren imitazioa dute. Arotzeria horiek ez datoz bat lizentziaren xede den proiektuko proposamenekin (proiektuari erantsitako dokumentazioa, 2005eko uztailaren 5ean ikus-onetsia eta Larraungo Haraneko Udalak 2005eko uztailaren 1ean egindako errekerimenduari erantzunez aurkeztua), eta ez dute betetzen udal planaren araudia (113. artikulua). “Eraikina herriguneko etxe zaharren inguruan dago eta kanpoko arotzeriak derrigorrez zurezkoak izan behar dira” (enfasi erantsia).

e) Txostena ikusita, 2010eko martxoaren 31n, Larraungo Haraneko Udaleko alkateak zuzenketa-errekerimendua sinatu zuen, zeinetan hau adierazten baitzen:

“Goian aipatutako espedienteari dagokionez, arkitekto aholkulariak txostena egin du, 2010eko martxoaren 30ean.

Hori dela eta, zuk egindako eskaera bideratzen jarraitu ahal izateko, Larraungo Udalak hauxe ESKATZEN DIZU: Udal Arkitektoak egindako txostenaren baldintzak betetzen dituen agiri teknikoak EKAR DITZAZULA”.

Ezagutzen ez diren arrazoiak direla-eta, errekerimendu hori ez zitzaion inoiz ez interesdunari jakinarazi.

f) 2023ko azaroaren 14an, interesdunak Larraungo Haraneko Udalean idazki bat aurkeztu zuen. Horren bidez, adierazi zuen, 2009ko ekainaren 29ko eskaerari ez zitzaiola oraindik jaramonik egin eta horregatik hau adierazi zuen:

"Beraz, nahikoa denbora igaro denez ezer jakinarazi gabe eta 2009ko ekainaren 29an eskatutako lehen erabilerako lizentzia eman gabe, uste dut administrazio-isiltasunez baietsi dela, Administrazio Publikoen Administrazio Prozedura Erkidearen urriaren 1eko 39/2015 Legearen 24.1 artikuluan xedatutakoaren arabera. Era berean, 1/2017 Legegintzako Foru Dekretuaren 194.7 artikuluan (Lurraldearen Antolamenduari eta Hirigintzari buruzko Foru Legearen testu bategina onesten duena) ezartzen da lizentziak gehienez ere bi hilabeteko epean ebatziko direla, erregistro orokorrean dokumentazio guztia aurkezten denetik zenbatzen hasita. Epe hori pasata eta ezer jakinarazten ez bada, ulertuko da lizentzia eman dela administrazio-isiltasunez, estatuko oinarrizko araudian kontrakoa ezarri ezean.

39/2015 Legearen 24.4 artikuluan ezarritakoaren arabera, emandako isiltasuna egiaztatzen duen ziurtagiria eskatzen dut.

39/2015 Legearen 21. artikuluan xedatutakoaren arabera, isiltasunez baiestea alde batera utzi gabe, administrazioak ebazteko betebeharra du, eta, beraz, ahalik eta lasterren behar du dagokion lizentzia emateko ebazpena”  (enfasi erantsia).

g) Larraungo Haraneko Udalak ez dio erantzun idazki horri.

Oinarri faktiko hori kontuan hartuta, bidezkoa da kexaren petitum hori aztertzea. Funtsean, interesdunak 2023ko azaroaren 14an Larraungo Haraneko Udalean aurkeztu zuen idazkian zegoen berbera da.

4. Administrazio Publikoen Administrazio Prozedura Erkidearen urriaren 1eko 39/2015 Legearen 21.1 artikuluarekin bat eginez, horiek behartuta daude prozedura guztietan berariazko erantzuna ematera eta hori jakinaraztera, prozedurei hasiera emateko modua edozein dela ere.

Ebazpen- eta jakinarazpen-lan hori egin behar den denbora-koordenatuei dagokienez, artikulu bereko 2. atalak ezartzen du “berariazko ebazpena jakinarazteko gehieneko epea dagokion prozedura arautzen duen arauak ezarritakoa izango dela".

Hirigintza-lizentzien kasuan, Lurraldearen Antolamenduari eta Hirigintzari buruzko Foru Legearen testu bategina onesten duen uztailaren 26ko 1/2017 Legegintzako Foru Dekretuaren 194.7 artikuluak honako hau ezartzen du:

“Lizentziak gehienez ere bi hilabeteko epean ebatziko dira, erregistro orokorrean dokumentazio guztia aurkezten denetik zenbatzen hasita. Epe hori pasata eta ezer jakinarazten ez bada, ulertuko da lizentzia eman dela administrazio-isiltasunez, estatuko oinarrizko araudian kontrakoa ezarri ezean.

Administrazio-isiltasunez lizentzia lortzeak ezin izango du urratu legeetan, lurralde-antolamenduko tresnetan eta goragoko mailako hirigintza-planetan xedatutakoa. Era berean, ezin izango dira eskuratu, administrazio-isiltasunez, legeriaren eta lurralde- edo hirigintza-antolamenduaren aurkako ahalmen edo eskubideak. Ematen diren lizentziak erabat deusezak izango dira, bai eta lortzen diren ahalmen eta eskubideak eraginkortasunik gabekoak ere, administrazio-isiltasunez, legeetan eta hirigintzako ordenamendu juridikoa osatzen duten gainerako xedapenetan xedatutakoaren aurka" (enfasi erantsia).

5. Kexa hau ebazteko, hasteko, honako hau adierazi behar da: interesdunari behar bezala jakinarazi ez zitzaionez, erakunde honek uste du 2010eko martxoaren 31ko errekerimendua ezin dela egindakotzat hartu, eta, beraz, ezin dezakeela ondoriorik izan, eta ezin dela aintzat hartu.

Premisa hori ezarrita, erakunde honek uste du egoera honelakoa dela: bi hilabeteko epean lehen erabilerako edo okupatzeko lizentziaren eskaerari jaramonik egin ez zitzaionez, baliozkotzat hartu behar zen administrazio-isiltasuna zela-eta (1/2017 Legegintzako Foru Dekretuaren 194.7 artikulua). Hala ere, udaleko arkitektoaren 2010eko martxoaren 30eko txostena ikusita, lizentzia ematea ez dator bat aplikatu beharreko hirigintza-araudiarekin, eta horrek lizentzia deuseztatzea ekar lezake. Horren ondorioz, 39/2015 Legearen 106. artikuluan eta Nafarroako Kontseiluari buruzko ekainaren 9ko 8/2016 Foru Legearen 15. artikuluan ezarritakoarekin bat etorriz, lizentziaren ofiziozko berrikuspen bat egitea ekar lezake, zeinak, aldi berean, Nafarroako Kontseiluaren txosten lotesle bat eskatuko bailuke.

Kontuan hartuta zenbat denbora igaro den lehen erabilerako edo okupatzeko lizentzia eskatu zenetik, eta kontuan hartuta lizentzia hori isiltasun positiboaren ondorioz emateak eta, ondoren, deuseztasunagatik berrikusi ahal izateak ekarriko lituzkeen kalteak, erakunde honen ustez komenigarria litzateke higiezina berriro bisitatzea, indarrean dagoen hirigintza-araudia urratzen jarraitzen duen egiaztatzeko eta, hala badagokio, egoera zuzentzeko neurriak hartzeko.

Udalak txostenean adierazi duenez hori egingo dutela, erakunde honen ustez ez da beharrezkoa, oraingoz, ildo horretako gomendiorik edo iradokizunik egitea.

6. Horri kalte egin barik, islatuta geratu denez, kexaren xede den gaia sortu zen interesdunari ez zitzaizkiolako bi idazki behar bezala eta epe barruan jakinarazi:

a) Alde batetik, 2009ko ekainaren 29an, zeinetan higiezinaren lehen erabilerako edo hori okupatzeko lizentzia eskatu baitzuen, eta

b) Beste aldetik, 2023ko azaroaren 14an, zeinetan gauza bi hauek eskatu baitzituen:

1) 2009ko ekainaren 29ko idazkiari jaramonik ez egitearen ondoriozko isiltasun positiboa egiaztatzen duen ziurtagiria; eta

2) Higiezinaren lehen erabilerako edo hori okupatzeko lizentzia berariaz ematea.

Hiru eskaera horien edukia kontuan hartuta, erakunde honek hau uste du:

a) 1/2017 Legegintzako Foru Dekretuaren 194.7 artikuluaren arabera, 2009ko ekainaren 29ko eta 2023ko azaroaren 14ko idazkietako lehen erabilerako edo okupatzeko lizentzien eskaerei bi hilabeteko epean erantzun behar zitzaien.

b) 39/2015 Legearen 24.4 artikuluaren arabera, 2009ko ekainaren 29ko idazkiari behar bezala eta epe barruan erantzun ez izanaren ondorioz sortutako isiltasun positiboa egiaztatzen duen ziurtagiriaren eskaera hamabost egunetan ebatzi behar zen.

Eskaera horietako bakar bati ere ez zitzaionez garaiz eta behar bezala erantzun, erakunde honek egokitzat jotzen du Larraungo Haraneko Udalari legezko betebeharra gogoraraztea, hau da, garaiz eta behar bezala erantzutea, eta interesatuaren eskaerei lehenbailehen erantzuteko gomendatzea.

7. Beraz, eta Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.1. artikuluak ematen dizkion eskumenen arabera, hau jo du beharrezkotzat:

a) Larraungo Haraneko Udalari gogoraraztea epe barruan eta behar bezala erantzun behar diela herritarren idazkiei.

b) Larraungo Haraneko Udalari gomendatzea interesdunaren 2009ko ekainaren 29ko eta 2023ko azaroaren 14ko idazkiei ahalik eta lasterren erantzutea.

Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.2. artikuluari jarraikiz, eta aginduzkoa betez, Larraungo Udalak bi hileko epean jakinarazi beharko du ebazpen hau onartzen duen eta, dagokionean, hura betetzeko zer neurri hartu dituen.

Lege-agindu horretan xedatzen denez, aipatutako administrazio publikoak arartekoaren erabakia onartzen ez badu, erakunde honek erabaki dezake gai hori dagokion urteko txostenean sartzea eta Nafarroako Parlamentuan azaltzea, jarrera hori izan duen administrazio publikoa berariaz aipatuz, baldin eta arartekoaren iritziz erabakia onartzea posible bazen.

Adeitasunez, zure erantzunaren zain,