Partekatu edukia
Trafikoa eta bide-segurtasuna
Gaia: Las condiciones de anchura de la licencia de vado concedida por el Ayuntamiento de Esteribar al autor de la queja.
Esteribarko alkatea
Alkate jauna:
1. 2024ko azaroaren 27an, instituzio honek (…) jaunaren idazki bat jaso zuen, zeinaren bidez kexa bat aurkeztu baitzuen pasabidearen zabalera dela-eta.
Idazki hartan, hauxe zioen:
“Ibia eman ziguten, 4 metroko zabalerakoa, eta gaur esan digute 3 metrokoa dela 51. NAOn (2016-03-15) argitaratutako 3. Zerga Ordenantzaren arabera. 2023ko azaroaren 21ean, ibiaren emakidaren jakinarazpena idatziz jaso zen. Bertan, ordenantza aipatzen da, baina ez da azaltzen, eta, aitzitik, “pasatzeko 4 metroko zabalera” duela esaten zaigu. Ordaindutako fakturen formatua eta kontzeptua berbera da, eta horietan guztietan agertzen da “4 metroko zabalera”. Laguntza eskatzen dizuegu, Esteribarko Udalaren gardentasunik ezagatik babesgabe sentitzen baikara”.
2. Ondoren, erakunde honek Esteribarko Udalera jo zuen, gai horri buruzko informazio eske.
2025eko martxoaren 4an emandako txostena jaso zen, honako hau adierazten zuena:
“LEHENBIZIKOA.- Pertsona fisiko batek aurkeztu du kexa. Interes legitimoa daukala adierazten du, eta bere idazkiak Nafarroako Foru Komunitateko Arartekoari buruzko uztailaren 3ko 4/2000 Foru Legearen 21.1 artikuluan eskatutako baldintzak betetzen ditu. Beraz, udalak ezin du inolako oharrik egin kexa izapidetzeko onartzeari buruz.
BIGARRENA.- Gaiaren funtsa zehazteko, adierazi behar da ibi batek espaloiaren gainean pasatzeko eskubidea aitortzen duela, dagozkion ibilgailuak aparkatuko diren garajera sartzeko; beraz, ibia ezin da lizentzia ematen den garajera sartzeko atearen benetako zabalera baino zabalagoa izan.
HIRUGARRENA.- Aurkeztutako kexari dagokionez, lehenik eta behin adierazi behar da Alkatetzaren urriaren 22ko 417/2021 Ebazpenaren bidez, Esteribarko Udalak (...) jaunaren aldeko ibia jartzeko lizentzia eman zuela, “2016ko martxoaren 15eko Nafarroako Aldizkari Ofizialean (51. zk.) argitaratutako 3. Zerga Ordenantzako baldintzen arabera”. Urriaren 22ko 417/2021 Ebazpen horretan, ibia jartzeko lizentziaren ezaugarriak adierazi ziren:
“Kokalekua: (…).
Pasabidearen zabalera: 4 metro (3. Zerga Ordenantzako 5. artikuluaren arabera, tarifa kalkulatzeko 4 metroko gutxieneko zabalera ezartzen da).
Ibilgailu kopurua: beheko tartea (1 eta 5 ibilgailu artean).
Ondore data: 2021/10/15.
Plaka zenbakia: (…)”
Horrela, “ibilgailu kopurua” faktoreari dagokion tarifa aplikatu zitzaion beheko tartean (1 eta 5 ibilgailu artean): 38 euro, baita tarifa kalkulatzeko ezarritako gutxieneko “zabalera metroak” (4 metro) faktorea ere, zabalera erreala edozein zela ere.
LAUGARRENA.- Beraz, tarifaren kalkulua jasotzen duen dokumentuan agertzen den 4 metroko aipamenak ez du esan nahi garajera sartzeko benetako zabalera 4 metrokoa denik, baizik eta tasaren kalkulua aipatutako Ordenantzak ezarritakoaren arabera egin dela (“tarifa kalkulatzeko 4 metroko gutxieneko zabalera ezartzen da”). Tarifa hori, “ibilgailu kopurua” aldagaia edo faktorea alde batera utzita, soilik aldatuko litzateke benetako zabalera aipatu 4 metroak baino handiagoa balitz; horrela, esaterako, garajearen zabalera metro batekoa balitz, 4 metroko zabalerari dagokion tarifa aplikatuko litzateke, nahiz eta ibiaren zabalera metro batekoa izan.
BOSGARRENA.- Bestalde, (...) jaunak aipatzen duen eta idazki honen “HIRUGARRENA” puntuan adierazi den bezala, emandako lizentziak berariaz aipatzen zituen ibi lizentzia arautzen duen Zerga Ordenantza eta hura argitaratu den Nafarroako Aldizkari Ofizialaren zenbakia eta data; beraz, kexagileari ez zaio inoiz ezkutatu ibi lizentziak arautzen dituen tarifa araubideari buruzko informaziorik; aitzitik, Nafarroako Aldizkari Ofizialean argitaratutako testua eskuratzeko aukera eman zaio hasiera-hasieratik.
SEIGARRENA.- Hala ere, (...) jaunak azaldutako gertakariak ikusita, udalak onartu du ordenantzaren idazketa errazagoa eta ulerterrazagoa izan litekeela, eta, beraz, Esteribarko bizilagunei arazoak saihesteko, modu argiagoan berridazteko aukera aztertzeko konpromisoa hartu du”.
3. Jasota geratu denez, kexaren funtsa zera da: Esteribarko Udalak interesdunari ustez aparkaleku esklusiborako erreserbatutako metro kopurua (lau metro) eta une honetan tokiko erakunde horrek aitortzen dion metro kopurua (hiru metro) bat ez etortzea.
Lau metroko lizentzia eman zitzaiola egiaztatzeko, interesdunak, kexarekin batera, 2023ko apirilaren 21eko eta azaroaren 20ko bi idazki aurkeztu zituen, Esteribarko Udalaren 3. Zerga Ordenantzan ezarritako tasen likidazioari buruzkoak. Idazki horietan adierazten da erreserba lau metrokoa izanen dela.
Horri dagokionez, Esteribarko Udalak adierazi du lau metroak tasa kalkulatzeko Zerga Ordenantzan erreferentzia gisa erabiltzen den gutxieneko unitatea dela, eta unitate horrek ez duela zertan bat etorri benetan erreserbatutako bide publikoko metro kopuruarekin, baldin eta zenbaki hori, erreserbaren ondorioz ibilgailuak aparkatu ezin izanen diren garajeko atearen luzerari nahitaez lotuta dagoena, zifra hori baino txikiagoa bada.
4. Esteribarko Udalaren 3. Zerga Ordenantzaren 5.1 artikuluak honako hau ezartzen du:
“Espaloi gainetik igarotzearen bidezko aprobetxamendu kasuetan, Zerga Ordenantza honen eranskinean ezarritako tarifak aplikatzeko oinarria erabilitako ibiaren zabaleraren araberakoa izanen da, eta gutxieneko zabalera 4 metrokoa izanen da. Plaza kopurua ere hartuko da oinarri” (guk azpimarratu dugu).
Era berean, eranskinaren I. epigrafean, “ibilgailuak pasatzeari” dagozkion tarifak ezartzen dira, eta lehenbiziko atalean “turismoentzako garaje pribatuei” aplikatzekoak adierazten dira. Metro linealeko eta urteko, honako hauek izanen dira:
“–1 eta 5 ibilgailu artean: 38,00 euro.
–6 eta 10 ibilgailu artean: 58,00 euro.
–11 eta 25 ibilgailu artean: 96,00 euro.
–26 eta 50 ibilgailu artean: 132,00 euro.
–51 eta 75 ibilgailu artean: 186,00 euro.
–76 eta 100 ibilgailu artean: 229,00 euro.
–101 eta 150 ibilgailu artean: 271,00 euro.
–150 ibilgailu baino gehiago: 350,00 euro”.
Erakunde honen iritziz, Ordenantzaren idazketa nahasgarria da; izan ere, tasa kalkulatzeko lau metro lineal zenbatuko direnez, nahiz eta garaje pribatuko atea txikiagoa izan (“erabilitako ibiaren zabalera”), tasaren subjektu pasiboak pentsa dezake bide publikoaren erreserba lau metro linealekoa dela, eta ez bakarrik garaje pribatuko atearen tamainarenak.
Horregatik, udalak bere txostenean adierazi duenaren ildotik, erakunde honek egokitzat jotzen du iradokitzea, nahasketarik egon ez dadin, udalak beharrezko neurriak har ditzala 3. Zerga Ordenantza modu argiagoan eta zehatzagoan berridazteko.
5. Beraz, eta Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.1. artikuluak ematen dizkion eskumenen arabera, hau jo du beharrezkotzat:
Esteribarko Udalari iradokitzea behar diren neurriak har ditzala 3. Zerga Ordenantza modu argiagoan eta zehatzagoan idazteko. Ordenantza horrek ibilgailuak espaloietan barrena sartzeko tasak eta bide publikoko erreserbak arautzen ditu, aparkaleku esklusibo gisara erabiltzeko, ibilgailuak gelditzeko eta edozein motatako salgaien zamalanetarako.
Nafarroako Foru Komunitateko Arartekoaren erakundea arautzen duen uztailaren 3ko 4/2000 Foru Legearen 34.2. artikuluari jarraikiz, eta aginduzkoa betez, Esteribarko Udalak bi hileko epean jakinarazi beharko du ebazpen hau onartzen duen eta, dagokionean, hura betetzeko zer neurri hartu dituen.
Lege-agindu horretan xedatzen denez, aipatutako administrazio publikoak arartekoaren erabakia onartzen ez badu, erakunde honek erabaki dezake gai hori dagokion urteko txostenean sartzea eta Nafarroako Parlamentuan azaltzea, jarrera hori izan duen administrazio publikoa berariaz aipatuz, baldin eta arartekoaren iritziz erabakia onartzea posible bazen.
Adeitasunez, zure erantzunaren zain,
El Defensor del Pueblo de Navarra
Nafarroako Arartekoa
Patxi Vera Donazar
Partekatu edukia