Irailaren 22ko 168/2010 Ebazpena, Nafarroako Foru Komunitateko Arartekoarena, [?] jaunak aurkeztutako kexari buruzkoa.

2010 iraila 22

Toki-entitateen funtzionamendua

Gaia: No publican en el tablón de anuncios las convocatorias a sesiones ni las copias de las actas

Exp: 10/517/D

Nº: 168

Toki Entitateen Funtzionamendua

AURREKARIAK

2010eko ekainaren 24an, [?] jaunak aurkeztutako idazki bat sartu zen gure erakundean. Haren bidez, kexa bat agertzen zuen Narbarteko Kontzejuaren aurka, lege-aginduak ez betetzeagatik.

Azaltzen zuen kontzejuko batzarrerako bilkuretarako deialdiak eta akten kopiak ez direla jendaurrean jartzen iragarkien oholean, Nafarroako Toki Administrazioari buruzko Foru Legean ezarri bezala. Kexa-egilearen esanetan, aipatutako legezko betebeharra idatziz gogorarazi zaio kontzejuko batzarrari behin baino gehiagotan.

Amaitzeko, erakunde honen esku-hartzea eskatzen zuen, bizilagunen ordezkariek beren betebeharrak bete ahal ditzaten.
Kexa jasota, Narbarteko Kontzejuari eskatu zitzaion planteatutako gaiari buruzko txostena igor zezan.

2010eko abuztuaren 24an, kontzejuak igorritako txostena sartu da gure erakundean. Hauxe dio, hitzez hitz:

“Kexan adierazten da bilkuretarako deialdiak eta akten kopiak ez direla jendaurrean jartzen. Bada bilkuretako akta guztiak bai jartzen dira jendaurrean herriko iragarkien oholean”.

Kontzejuaren txostenean ez denez inongo aipamenik egiten bilkuretarako deialdiak jendaurrean jartzeari buruz, berriz ere eskatu zitzaion kontzejuari jakitera eman zezan ea bilkuretarako deialdiak iragarkien oholean jendaurrean jartzen diren ala ez.

2010eko irailaren 13an, kontzejuak igorritako txostena sartu da gure erakundean. Hauxe dio, hitzez hitz:

Narbarteko Kontzeju Batzar honek ez du administrari finkorik kontzejuko bulegoetan, gurea bezalako toki entitateek baliabide eskasak baitituzte.
Kontzeju Batzarreko kideek ez dituzte ordu guztiak kontzejukide gisa dauzkaten eginkizunetan erabiltzeko, ez eta malgutasunik ere bileretarako deia aurrez behar den denborarekin egin ahal izateko ere. Bilkurak aldizka egiten dira, kontzejukideek horretarako aukera izatearen arabera, eta gainera aholku emateko eta aktak idazteko laguntzako langileek ere biltzeko modua dutenean. Kontzejukide guztiak bilkurak egiteko bildu ahal izatea oso zail gertatzen da askotan.
Iragarkien oholean bando bat dago, non kontzejuko bulegoen ordutegia agertzen baita, eskabideak igortzeko posta elektronikoko helbide batekin batera. Kontzejuaren bulegoetako atarian postontzi bat dago, edozein idazki bertan utzi ahal izateko.
2010eko urtarriletik uztailera kontzejuko bulegoak zabalik egon dira astearte eta asteazkenetan, goizez, herri-lurren gaineko transakzio-hitzarmena dela eta. [?] jauna bera ere bulegoetara joan zen, Herri-lurren zerbitzuko teknikariekin bilera bat izateko, eta horren ondoren beste hitzordu bat eman zitzaion, baina ez zen bertaratu; horren ordez, Nafarroako Gobernuko Herri-lurren Zerbitzuko bulegoetara joan zen. Adierazi beharra dago, era berean, batzarkideek eskatu duten bizilagunei beren etxeetan ere eman izan dietela laguntza.
[?] jaunak bilatzen duen gauza bakarra da kontzejuari egonkortasuna galaraztea eta hauteskundeetan inor ere aurkez ez dadin saiatzea. Inoiz ere ez die laguntzarik eman nahi izan kontzejukideei beren lanak egiteko.
Behin baino gehiagotan gertatu da kontzejurako hauteskundeetara ez dela inongo talderik aurkeztu, eta batzar bat eratu behar izan dela, Nafarroako Gobernuak batzorde kudeatzaile bat izendatu ondoren. Azken hauteskundeetan, [?] jaunak Kontzejuko Batzarrerako hautagai izateko eta hautatua izateko aukera izan zuen. Horretarako gonbita egin zitzaionean, keinu lizunekin eta “Hemendik” esanez erantzun zuen.

AZTERKETA

Toki Araubidearen Oinarriei buruzko Legeko 70. artikuluak ezartzen du tokiko korporazioetako osoko bilkuretako saioak publikoak direla. Herritarrek toki entitateen organoen saio publikoetara joateko eskubide hori eraginkor egiteko, Nafarroako Toki Administrazioari buruzko uztailaren 2ko 6/1990 Foru Legeak, 93.2 artikuluan, honakoa ezarri zuen: “Bilkuretarako deiak entitate horretako ediktu oholean iragarri beharko dira korporaziokideei jakinarazten zaien aldi berean”. Horrek esan nahi du bi egun balioduneko denborarekin (Nafarroako Toki Administrazioari buruzko Foru Legeko 78.1 artikulua) Narbarteko ediktuen oholean argitaratu behar direla Kontzeju Batzarraren bilkuretarako deialdiak, salbu eta presako izaeraz deitzen diren bilkura berezien kasuan.

Azken batean, kontzejuko iragarkien oholean Narbarteko Kontzeju Batzarraren bilkura arruntetarako eta berezietarako deialdiak argitaratzea legezko agindu bat da, Narbarteko Kontzejuak eraginkor egin behar duena.
Erakunde honek ulertzen ditu Nafarroako kontzejuek dauzkaten zailtasunak, beren jarduera toki entitateen funtzionamenduari buruzko arauetara guztiz egokitzeko. Biztanle gutxi dituzte, kudeaketarako baliabide tekniko eta pertsonalak falta zaizkie, eta gainerakoei zerbitzatzeko borondatea behar izaten da eginkizun horietan: horiek guztiak Nafarroako kontzejuetako ordezkaritza organo gehienetan aktibo eta presente dauden inguruabarrak dira. Hala eta guztiz ere, ez da aitzakiarik edo zailtasunik jarri behar legeak herritarrei aitorturiko eskubide bat, kontzejuaren bilkuretara joatekoa, betetzeko (kasu honetan, are interes handiagoarekin, interesduna herriko biztanlea baita).

Aurreko guztia dela eta, erakunde hau arautzen duen foru legeko 34.1 artikuluan ezarritakoari jarraituz,

EBATZI DUT:

Narbarteko Kontzejuari gogoraraztea legez entitateko ediktuen oholean argitaratu behar dituela, bi eguneko denborarekin, kontzejuaren bilkuretarako deialdiak.
Narbarteko Kontzejuari bi hileko epea ematea erakunde honi jakinarazteko ebazpen hau onartzen duen eta behar diren neurriak hartu dituen azaldutako zentzuan edo hori ez egiteko arrazoiei buruz informatzeko. Halaber, ohartarazten zaio hala egiten ez badu, gertatutakoa 2010eko ekitaldiari buruz Nafarroako Parlamentuan aurkeztuko dudan urteko txostenean jasoko dudala.
Erabaki hau Narbarteko Kontzejuari eta kexa-egile [?] jaunari jakinaraztea, eta haiei jakitera ematea erakunde hau arautzen duen Foru Legeko 35.4 artikuluan ezarritakoaren arabera, ezin dela ebazpen honen aurkako errekurtsorik aurkeztu.

Nafarroako Arartekoa

Francisco Javier Enériz Olaechea