Irailaren 1eko 145/2010 Ebazpena, Nafarroako Foru Komunitateko Arartekoarena, [?] jaunak aurkeztutako kexari buruzkoa.

2010 iraila 01

Función Pública

Gaia: Mancomunidad impide el reingreso de trabajador en excedencia, incumpliendo el acuerdo firmado entre las partes

Exp: 10/395/F

Nº: 145

Funtzio publikoa

AURREKARIAK

Aurtengo maiatzaren 24an, [?] jaunak kexa bat aurkeztu zuen honako administrazio publikoen aurka:

Lehena. Zangozako Udalaren aurka, udaleko plantilla organikoa Nafarroako Aldizkari Ofizialean ez argitaratzeagatik eta, horrekin, hura ezagutzea edo haren aurkako errekurtsoa aurkeztea eragozteagatik.

Kexa-idazkian azaltzen du ez duela ezagutzen [?] andrearen egoera administratiboa, zeren eta udal kontu-hartzaile lanetan jarduten baitu lanpostu horretan aritzeko ahalmena duela demostratzeko inongo probarik gainditu gabe. Gainera, plantilla organikoa argitaratu ez denez, ez daki administrari laguntzailearen lanpostua, lehenago [?] andreak betetzen zuena, amortizatuta dagoen ala behin-behineko kontratupeko batekin bete den.

Azaltzen du Zangozako bizilagun gisa, eskatu duela Zangozako Udaleko plantilla organikoaren behin betiko onespena igor diezaioten, baina ez duela inongo erantzunik jaso.

Bigarrena. Zangozako Eskualdeko Mankomunitatearen aurka, Mankomunitateko gerenteak sinaturiko akordioa ez betetzeagatik.

Kexa-egileak bere idazkian azaltzen du berak eta Mankomunitateko lehendakariak akordio bat sinatu zutela 2009ko azaroaren 12an, eta akordio horren bitartez [?] jaunari, Mankomunitateko kudeatzaileari, “eskubidea aitortu zitzaiola jatorrizko lanpostura itzultzeko lanpostua gordeta edukitzeko eskubideak indarra duen aldi guztian, hau da, eszedentziako lehenengo hemezortzi hilabetetan, eta langileak aurre-abisu bat eman beharko zuela lanpostura itzuli baino hamabost egun natural lehenago”. Kexa-egileak azaltzen du Mankomunitatera kudeatzaile gisa berriz sartzeko eskatu duela, baina erantzun diotela esanez berriz sartzeko eskubiderik ez duela.
Kexa jasota, idazki bana igorri nien Zangozako Udalari eta Zangozako Eskualdeko Mankomunitateari, planteatutako gaiari buruzko informazioa eman ziezadaten.

2010eko abuztuaren 3an, udalak igorritako txostena sartu da erakunde honetan. Honakoa dio, hitzez hitz:
1. “Udal honek plantilla organikoa urtero onetsi duen arren –hura bermatzen duten aurrekontuen data berean–, egiazki hura ez da Nafarroako Aldizkari Ofizialean argitaratu; 2010. urteari buruzko iragarkia –2010eko apirilaren 27ko Osoko Bilkuraren bitartez onetsitakoa–, berriz, NAOra igorri da, eta hura argitaratzeko zain gaude.
2. [?] andrea administrari laguntzailearen lanpostu baten titularra da udal honetako plantillan 1996-02-26tik. Langileak Ekonomiako lizentziadun titulua dauka.
3. 1997ko apirilaren 24ko Osoko bilkuran, garai hartako kontu-hartzaile [?] jaunak borondatezko baja eskatu baitzuen Zangozako Eskualdeko Zerbitzuen Mankomunitateko kudeatzaile lanpostuan sartzeko, erabaki zen [?] andreari gaitasuna ematea kontu-hartzaile eginkizunetan jardun zezan, Toki Administrazioari buruzko Foru Legeko 235.3 artikuluan xedatuaren arabera, garai hartan indarra zuen legea baitzen; langile horrek administrari laguntzailearen lanpostua gordeta dauka; lanpostu hori beste pertsona batek betetzen du aldi baterako kontratuarekin.
4. Lanpostu hori betetzea Nafarroako Gobernuari dagokio. 11/2004 Foru Legea garatuz lanpostuak betetzeko egin zen deialdian, [?] andreak parte hartu zuela eta gaikuntza emateko hautaprobak gainditu zituela. Alabaina, ezin izan zen lanpostura sartu, Konstituzio Auzitegiak lege hura deuseztatu baitzuen.
  2010eko abuztuaren 9an eta 17an, Zangozako Eskualdeko Mankomunitateak igorritako txostenak sartu dira gure erakundean. Ez ditugu haiek transkribatu ez baita bidezkoa, aurrerago justifikatuko dugun bezala, haien jarduera gainbegiratzea.

AZTERKETA

Interesdunak azaldutako gaietako bat da ez zaiola erantzunik eman Zangozako Udalaren plantilla organikoaren behin betiko onespena eskatzeko aurkeztutako eskabideari. Izan ere, eskabide aurkeztu ondoren, ez du inongo erantzunik jaso.

Administrazio prozedura erkidean funtsezkoa da administrazio publiko orok ebazpen espresa eman behar izatea interesdunek eskatutako eskari guztiei (Herri administrazioen araubide juridikoaren eta administrazio prozedura erkidearen azaroaren 26ko 30/1992 Legeko 42. artikulua). Arau horren ondorioz, herritar batek, Administrazioari eskabide bat egin badio, eskubidea du kasuko prozedura abiaraz dadin, eta eskabidearen edukiari buruzko erantzun puntuala jasotzeko.

Aipatu arauak benetako betebehar bat ezartzen dio Administrazioari, interesdunek aurkezturiko eskabideei ebazteari dagokionez, eta betebehar hori benetako berme bat da herritarrarentzat.

Kexaren xedea den kasuan, Zangozako Udalak ez dio interesdunak egindako eskabideari erantzun; ez du, ezta ere, eskabide hori onartzeko modukoa ez denik adierazi, eta, azkenik, ez du eskabidea tramitera onartu, aurrerago hura baiesteko nahiz ezesteko edukiari buruzko ebazpen espresa ematearren, behar diren arrazoiekin.

Azken batean, Zangozako Udalak ez dio idazki horri inolako tramiterik eman, aintzat hartu gabe interesdunak Administrazioari bere eskaerari buruzko erantzun espresa eskatzeko eta erantzun hori lortzeko interes legitimoa eta eskubidea dituela.

Erakunde honen ustez, txostena ebazpen honetan hitzez hitz transkribatzeak ez du ordezten Udalak haren edukia kexa-egileari helarazteko duen betebeharra, hain zuzen ere eskabideetako erantzunak jakinarazteko ohiko moldean.
Nafarroako Toki Administrazioari buruzko uztailaren 2ko 6/1990 Foru Legeko 236.1 artikuluak ezartzen du “toki korporazioetako plantilla organikoak urtero onartu beharko direla”. Era berean, Nafarroako Administrazio Publikoen zerbitzuko langileen Estatutuaren 20.2 artikuluak betebehar bat ezartzen die administrazioei, hain zuzen ere haiek urtero Nafarroako Aldizkari Ofizialean argitaratzea.

Zangozako Udalak ez du argitaratu udaleko plantilla organikoa; horrenbestez, plantilla organikoa argitaratzeari buruz legeak ezarritakoa urratu du. Urratze horrek exijitzen du erakunde honek legezko betebeharren behar den gogorarazpena egitea.
Kexa-egileak Zangozako Eskualdeko Mankomunitateari egozten dionari dagokionez, zehaztu beharra dago kasuari buruzko prozedura judizial bat bidean dagoela, hain zuzen ere Iruñeko Lan arloko 2. epaitegian [?] jaunak Zangozako Eskualdeko Zerbitzuen Mankomunitatearen aurka aurkeztutako demanda, kaleratzea erreklamatzeari buruzkoa, eta, horrenbestez, ezin dugula egotzitako horri buruzko ikerketarik abiatu legeak ezarritakoaren ondorioz.

Erakunde hau arautzen duen Foru Legeko 23.2 artikuluak ezarritakotik heldu da murriztapen hori; izan ere, lege horren arabera, Nafarroako Arartekoak ezin ditu banaka aztertu epai irmoaren zain dauden kexak edo erabaki judizial bat iristeko zain daudenak. Eta horren oinarria da epaitegiek gaiari buruz egiten duten pronuntziamendua ezagutu beharra dagoela haren arabera jokatzeko, zeren eta auzitegiek eta epaitegiek beren eginkizun jurisdikzionalak betetzeko hartutako erabakiak, ezin baititu berrikusi botere judizialaz kanpokoak diren erakundeek, Espainiako Konstituzioko 117.3 artikuluak ezarritakoaren arabera.

Horrenbestez, erakundea arautzen duen foru legeko 34.1 artikuluarekin bat,

EBATZI DUT:

Zangozako Udalari gogoraraztea legez, Nafarroako Administrazio Publikoen zerbitzuko Langileen Estatutuan ezarritakoaren arabera, beren plantilla organikoa onetsi behar dutela, eta datu pertsonalak eta arauz erregulatutako gainerako inguruabarren berri eman behar dutela.
Zangozako Udalari bi hilabeteko epea ematea erakunde honi jakinaraz diezaion ebazpen hau onartu duen jakinaraz dezan eta horren ondorioz hartuko dituen neurriei buruz informa dezan, edo, bestela, ebazpena ez onartzeko arrazoiei buruz informa dezan. Orobat ohartarazten diot hala egiten ez badu Nafarroako Parlamentuari igorriko diodan urteko txostenean sartuko dudala kasua, uztailaren 3ko 4/2000 Foru Legeko 34. artikuluko bigarren idatz-zatian jasotzen den moduan.
Kexa-egileari, Zangozako Eskualdeko Mankomunitateari eta Zangozako Udalari ebazpen honen berri ematea, eta adieraztea ezin dela horren kontrako errekurtsorik jarri.

Nafarroako Arartekoa

Francisco Javier Enériz Olaechea