Partekatu edukia
Hirigintza eta Etxebizitza
Gaia: Denuncia construcciones ilegales en suelo no urbanizable en peligro de derrumbe
Exp: 10/664/U
Nº: 208
Urbanismo
2010eko abuztuaren 30ean, [?] jaunak izenpetutako idazki bat sartu zen gure erakundean. Haren bidez, kexa bat azaltzen zuen Leitzako Udalaren aurka eta Lurraldearen Antolamendu eta Etxebizitza Departamentuaren aurka, erortzeko arriskuan dauden legez kanpoko eraikuntza batzuen egoera dela eta.
Azaltzen du behin baino gehiagotan Leitzako alkatetzan salatu duela legez kanpoko hiru eraikinen egoera; eraikin horiek baimen edo lizentziarik gabe eraiki dira [?]ren ondoan nahiz ondoko lurretan, [?] auzoan (1. poligonoko 157 lurzatia). Horietako batzuk herriko bide baten ondoan daude eta egoera tamalgarrian daude. Ibilgailuen nahiz oinezkoen gainean erortzeko egiazko arriskua dago.
Amaitzeko eskatzen du behar diren neurriak har daitezen haiek eraisteko.
2010eko urriaren 1ean, Lurraldearen Antolamendu eta Etxebizitza Departamentuko kontseilariaren txostena jaso genuen. Honakoa dio, hitzez hitz:
“Lurraldearen Antolamendu eta Etxebizitza Departamentuan ez dago jasota inongo salaketarik aurkeztu denik Leitzako 1. poligonoko 157. lurzatiko eraikinei buruz. Departamentu honetako artxiboetan ez da ageri, ezta ere, lurzati horretan inongo jarduerarik egiteko baimenik eskatu denik.
Hala eta guztiz ere, Nafarroako Arartekoaren idazkia jaso ondoren, departamentu honetako zerbitzu teknikoek, 2010eko irailaren 13an, ikuskapen bisita bat egin zuten toki horretan, eta egiaztatu zuten Leitzako 1. poligonoko 157.l lurzatian hiru eraikin daudela, etxeko korrale gisa erabiltzen direnak eta 40 urte inguru dituztenak, [?] jaunaren (korraleen erabiltzailea) ezkontideak dioenaren arabera. Ez dirudi hori egia denik, eraikinen egoerari erreparatuta.
Leitzako udal plan indardunaren arabera, eraikina kokatuta dagoen lurzatia oihan lurzoru ez urbanizagarri gisa dago sailkaturik; izan ere, haren babes-araubideak, araudi orokorreko 50. artikuluan aurreikusitakoak, ezartzen du lurzoru kategoria horretan debekatuta dagoela “etxebizitzak, granjak, nekazaritzarako biltegiak eta antzeko eraikinak egitea”. Azaldutakoa dela eta, ondorioztatzen da planeamenduarekin bat ez datozen eraikinak direla, eta ezin direla legeztatu. Azken batean, eraikin horiek antolamenduz kanpokotzat jotako eraikinetarako aurreikusi den araubidearen menpe egon beharko lukete, Lurraldearen Antolamenduari eta Hirigintzari buruzko abenduaren 20ko 35/2002 Foru Legeko 84. eta 207. artikuluei jarraituz.
Beste maila batean, adierazi beharra dago, Lurraldearen Antolamenduari eta Hirigintzari buruzko abenduaren 20ko 35/2002 Foru Legeko 222. artikuluan aurreikusitako preskripzio epeen arabera, ustez egin diren hirigintza-arauen urraketak preskribitutzat jo ahalko direla, eraikinen antzinatasuna berretsiz gero. Era berean, 35/2002 Foru Legeko 200. eta 201. artikuluetan ezarritakoaren arabera, eraikinak eraiki zireneko data kontuan izanda, amaitutzat eman beharra dagoela departamentuak esku hartzeko daukan lau urteko epea, urratutako hirigintzazko legezkotasuna berrezarri nahi izatekotan.
Azkenik, adierazi beharra dago 35/2002 Foru Legeko 196. artikuluak ezartzen duela udala bera eskuduna dela eraikin horiek aurri egoeran daudela deklaratzeko, artikulu horretako 2. idatz-zatian ezarritako kasuetan. Horri dagokionez, ez dakigu Leitzako U dalak jarduteko neurririk hartu duen.
Leitzako Udalari dagokionez, Nafarroako Foru Komunitateko Arartekoari buruzko uztailaren 3ko 4/2000 Foru Legeak 26. artikuluan xedatzen duenez, “botere publiko eta erakunde guztiek laguntza eman behar diote Nafarroako Foru Komunitateko Arartekoari lehentasunez eta presaz haren ikerketa eta ikusketetan”.
Agintari edo funtzionario publiko guztiek erakunde honi laguntzeko duten betebeharra ez da soilik teorikoa; izan ere, hura ez betetzeak ondorio larriak ekar ditzake.
Nafarroako Foru Komunitateko Arartekoari laguntzeko betebeharra ez betetzeak, informazioa bidatzen arrazoirik gabe atzeratzeak, jarduerak ez justifikatzeak eta, azken batean, erakundeen arteko harremanetan praktika okerra suposatzen duen beste edozein ekintzak beraiekin ekartzen dute parlamentu-erakunde honetaz arintasunez eta eraginkortasunez baliatzeko herritarrek duten eskubidea murriztea, eta antolamendu juridikoa urratzen du.
Administrazio arloan laguntza emateko betebeharra ez betetzeak dauzkan ondorioei dagokienez, honakoa jasotzen du Nafarroako Arartekoari buruzko uztailaren 3ko 4/2000 Foru Legeko 24.2 artikuluak: “Hasieran eskatutako txostena edo dokumentazioa ez dutela bidaliko edo eskura jarriko esaten badute Administrazio Publikoen zerbitzuko langileek, edo arduragabekeriaz jarduten badute, Nafarroako Arartekoak uste ahal izanen du bere eginkizunen kontrakoak edo oztopatzekoak direla egintza horiek; hori ezagutarazi eginen du berehalakoan, eta Nafarroako Parlamentuarentzat egindako urteko txostenean edo txosten berezian kalifikazio hori nabarmendu eginen du”.
Leitzako udal plan indardunaren arabera, eraikina kokatuta dagoen lurzatia oihan lurzoru ez urbanizagarri gisa dago sailkaturik; horrenbestez, haren babes-araubidearen menpean dago.
Bada, Lurraldearen Antolamenduari eta Hirigintzari buruzko abenduaren 20ko 35/2002 Foru Legeko 84. artikuluak honakoa xedatu zuen:
Bestalde, aipatutako foru legeko 196. artikuluak aurri deklarazioa arautzen du, eta honakoa ezartzen du hain zuzen ere:
Eraikuntzaren bat edo eraikuntza-zatiren bat aurri egoeran dagoenean, udalak, ofizioz edo interesaturen batek eskatuta, aurri egoera deklaratuko du eta, jabeari eta bizilagunei entzunaldia eman ondoren, bizilagunen eta hirugarrenen segurtasun fisikoa bermatzeko behar diren neurriak hartuko ditu, planeamenduaren aurreikuspenen arabera, kasua bada.
Horrenbestez, transkribatutako arauen arabera, Leitzako Udalak, udal planeamendua kontsultatu ondoren eta bidezkoak diren txostenak egin ondoren, [?] auzoko [?]ren ondoko eraikinak antolamenduz kanpo daudela deklaratu beharra dauka, eta, are gehiago, haiek eraisteko agindu beharko du, planeamenduan halakorik aurreikusi bada, edo, hala egiten ez badu, haiek aurri egoeran deklaratzeko prozedura abiatu beharko du, ageri duten aurri egoeraren zantzuak direla eta.
Aurreko guztia dela eta, erakunde hau arautzen duen foru legeko 34.1 artikuluan ezarritakoari jarraituz,
Leitzako Udalari gogoraraztea legez beti bete behar duela Nafarroako Foru Komunitateko Arartekoari buruzko uztailaren 3ko 4/2000 Legeko 24.1 eta 26.1 artikuluetan ezarritakoa, Nafarroako Foru Komunitateko Arartekoaren erakundeari lankidetza eta lehentasunezko laguntza emateari dagokionez, eta hari legezko ohartarazpenak egitea laguntzarik ez ematetik heldu daitezkeen erantzukizunei buruz.
Leitzako Udalari gomendatzea hirigintza txosten bat enkarga dezala, [?] auzoko [?]ren ondoko eraikinen egoera ezagutzeko, hirigintza planeamenduan ezarritakoaren ikuspuntutik. Txosten horren ondorioen arabera, arauei eta hirigintza planeamendu indardunaren arabera jokatu beharko du, eta haiek antolamenduz kanpo daudela deklaratu beharko du edo, bestela, aurri deklarazioaren prozedura abiatu beharko du.
Bi hilabeteko epea ematea Leitzako Udalari gomendio hau eta legezko betebeharren gogorarazpen hau onartu dituela jakinaraz dezan eta horren inguruan zer neurri hartuko dituen jakinaraz dezan, edo, bestela, haiek zergatik ez dituen onartu adieraz dezan. Halaber, ohartarazten diot hala egiten ez badu Nafarroako Parlamentuari igorriko diodan urteko txostenean sartuko dudala kasua, arestian aipaturiko foru legearen arabera. Hori, halere, ez da oztopoa izanen Nafarroako Arartekoari buruzko uztailaren 3ko 4/2000 Foru Legearen arabera beste neurri batzuk hartu ahal izateko.
Nafarroako Ararteko
Francisco Javier Enériz Olaechea
Partekatu edukia