Albisteak

Nafarroako Arartekoak 3 beka onesten ditu Zuzenbideko gradua duten pertsonentzat

Nafarroako Arartekoak Zuzenbideko gradua duten pertsonentzako 3 beka onartu ditu aurten, egresatuen prestakuntza juridikoa sustatzeko, herritarren eskubideak babestu eta hobetzearen arloan erakundeak egiten dituen jarduerak zuzenago ezagut ditzaten.

Beka berrien deialdiak gaur egun indarrean dauden beken muga-egunen egutegiaren arabera egingo dira, eta, horrela, mailaz mailako ohiko erreleboari ekingo zaio, beken iraupena urtebetekoa baita.

Beka-erregimen hori 2018an hasi zen, eta etenik gabe mantendu da orain arte. Urtero, 2 beka onartzen dira, euskara jakiteko baldintzarik gabekoak, eta 1 baldintza horrekin, erakundeak Foru Komunitateko hiru hizkuntza-eremuetako herritarren kontsultei eta kexei erantzun behar baitie.

Deialdiko lehenengo txanda euskara eskakizuna duen bekari dagokio aurten, eta beste bi deialdiak, ziur aski, berritzea dagokien egunetan egingo dira, hau da, maiatzean eta urrian.

Beka horien hileko zenbateko gordina 1.050 eurokoa da, laguntza ekonomiko publiko gisa, eta ez soldata gisa. Beka emateak berekin dakar onuradunak Gizarte Segurantzako Araubide Orokorrean sartzea, prestakuntza-programetan parte hartzen duten pertsonak Gizarte Segurantzako Araubide Orokorrean sartzeko baldintzak arautzen dituen urriaren 24ko 1493/2011 Errege Dekretuaren arabera

Prestakuntza-bekak bateraezinak dira Nafarroako Foru Erkidegoko Administrazioak emandako bekekin, bai eta beste administrazio, instituzio edo entitate publiko zein pribatu batzuek edo partikularrek emandako bekekin ere.

Hauek dira eskatzaileek bekaren iraunaldi osoan bete behar dituzten baldintzak:

1. Adinez nagusia izatea.
2. Espainiako nazionalitatea izatea edo Europar Batasuneko estaturen batekoa edo, Europar Batasunak sinatutako nazioarteko tratatuen aplikazio-eremuan sartutako estatu batekoa.
3. Zuzenbideko graduaren unibertsitate-titulu ofiziala izatea, Espainiako agintariek emana edo homologatua, eta deialdi bakoitza argitaratu baino lehenagoko hiru urtean lortu izana. Zuzenbideko graduaren baliokidea izango da Zuzenbideko eta beste zientzietako gradu bikoitza.
4. Bizitokia Nafarroan izatea, deialdia argitaratu baino urte bat lehenagotik gutxienez.
5. Jarduteko gaitasun osoa izatea, eta ez izatea bekaren xede den prestakuntza-jardueran aritzea galaraz diezaiokeen desgaitasun fisikorik edo gaixotasunik.
6. Zerga guztien ordainketak eta Gizarte Segurantzarekiko betebeharrak egunean dituela frogatzea, eta ez kobratzea administrazio edo entitate publiko edo pribatu batetik helburu bera duen beste edozein laguntza publiko bateraezinik.

Euskararen ezagutzaren baldintza duen bekaren kasuan, ezinbestekoa da, halaber, euskarako B2 maila edo maila baliokidea izatea.

Informazio gehiago nahi izanez gero, Nafarroako Arartekoaren webguneko Gardentasuna atala bisitatu daiteke, edo, zuzenean, deialdia.