Partekatu edukia
Nafarroako Arartekoak, Patxi Verak, Atena Fundazioaren egoitza bisitatu zuen joan den martxoaren 5ean, Iruñeko Azpilagaña auzoan. Kabineteburu Susana Galilearekin batera, erakundeko arduradunekin bildu zen: Erkuden Araburu, presidenteordea; Arantxa Garatea, gerentea; eta Sandra Ayelo, Arte eta Pedagogia arloko koordinatzailea.
Atena Fundazioak 25 urte daramatza frogatzen arteak bizitzak eralda ditzakeela. Bere misioa argia eta zentzuz betea da: espazioak eta aukerak sortzea desgaitasuna duten pertsonek beren talentua gara dezaten, beren adierazpenak egin ditzaten eta munduan beren lekua aurki dezaten dantzaren, antzerkiaren eta beste diziplina artistiko batzuen bidez. Izan ere, artea ez da adierazpen modu bat soilik, gizaki bihurtzen gaituen eskubide unibertsal bat baizik. Uste sendo horrekin, fundazioak erabiltzaileen bizi-kalitatea hobetzeko lan egiten du, bidean lagunduz eta etapa bakoitzean dituzten beharretara egokituz. Beren etxeetan edo zentro espezializatuetan, guztiek Atenan aurkitzen dute beren historiaren protagonista diren espazio bat.
Aurten, fundazioak harrotasunez ospatuko du bere arte-konpainiaren 25. urteurrena, eta 2026an, berriz, are mugarri handiagoa izango du: haren lehen mende-laurdena. Ospakizun bikoitz horren esparruan, Atenak inklusioarekin duen konpromisoa aldarrikatu nahi du, helburu hori talde-lanari eta beste erakunde batzuekiko lankidetzari esker baino ezin baita lortu.
Horregatik, sare eta elkarteetan parte hartzen du, hala nola Plena Inclusión Nafarroan, Nafarroako Dantzaren aldeko Elkartean eta Nafarroako Desgaitasunaren Batzorde Etiko Sektorialean, besteak beste. Batasunak indarra egiten du, eta Atena Fundazioan argi dute: ahaleginak batuz bakarrik eraiki daiteke denok leku bat eta ahots bat izango dugun gizarte bat.
Partekatu edukia