Albisteak

Herriaren Defendatzaileen adierazpen bateratua, Europa bizitzen ari den errefuxiatuen krisiaren aurrean.

Honako adierazpena sinatu dute gaur Herriaren Defendatzaileak eta bederatzi defendatzaile autonomikoek:

Bada denbora gerrak, goseak, intolerantziak eta elkartasunik ezak dakarten zorigaitzaren lekuko zuzena izaten ari dela Europa. Gure mugak etsi-etsian gainditu nahi dituzten pertsonengan eta itxaropenak bidean utzi zituztenen gorpuetan ikusgarri egiten diren pairamenak dira horiek.

Egoera hori, gainditu baino, izugarri okertu da hainbat gatazka beliko lehertu direnean, eta gatazka horiek eragin dute Europak II. Mundu Gerratik bizi izan duen errefuxiatuen krisirik handienatzat jo dena.

Gauzak horrela, azpian sinatu duten Herriaren Defendatzaileak ezin daitezke ezer egin gabe geratu milaka pertsonaren giza eskubideen kontrako atentatu horren aurrean. Arrazoi horrengatik, beharrezkotzat eta betebehartzat jo dute:

1. Aipatu taldeekiko elkartasuna eta konpromiso sendoa adieraztea, erakundeak haien zerbitzura jarriz, eta euren eskubideen babeserako eta euren harrera egokia bermatzeko bide eraginkorra izateko eskaintza eginez, adin txikikoak bereziki nabarmenduz.
2. Osoki sinatzea Iheslarientzako Nazio Batuen Goi Komisarioak Europako iheslariei buruz egindako adierazpena, nazioarteko organismo horrek egindako deialdiari gehituz horrela.

3. Europar Batasuneko Itunaren 3.5. eta 21. artikuluetan jasotako aurreikuspenak gogoraraztea Europako eta Espainiako autoritate publikoei. Europar Batasunak munduko gainontzekoekin dituen harremanei eta nazioarteko agertokian duen jarduerari buruzkoak dira aipatu aurreikuspenak. Horietan, komuneko politikak eta jardunbideak gidatu behar dituzten printzipioak zehaztu dira, eta, besteren artean, honakoak daude: giza eskubideen eta oinarrizko askatasunen unibertsaltasunaren eta zatiezintasunaren sustapena, giza duintasunarekiko errespetua, berdintasun eta elkartasun printzipioak eta Nazio Batuen Gutuneko printzipioekiko eta nazioarteko zuzenbidearekiko errespetua.

   Era berean, Europar Batasunak bere gain hartutako konpromisoak gogoraraztea; hala nola, xedetzat bakea iraunaraztea, gatazkak prebenitzea eta nazioarteko segurtasuna indartzea duten politika komunak zehaztea eta betearaztea; lankidetza aldeaniztun solidoan eta munduko gobernamendu onean oinarritutako nazioarteko sistema sustatzea; eta hondamendi naturalei edo gizakiak sortutakoei aurre egin behar dieten herriei, herrialdeei eta eskualdeei laguntzea.

   Horrek guztiak iheslariek egindako eskaerei arreta ematea du helburu, eta, bereziki, Giza Eskubideen Aldarrikapen Unibertsalaren 14. artikuluan eta Europar Batasunaren Oinarrizko Eskubideen Gutuneko 18. artikuluan ezarritakoaren babespean egindako asilo-eskaerei arreta ematea.

4. Eskaera egitea Espainiako Gobernuari, autonomia erkidegoetako gobernuei eta tokiko erakundeei, zera egin dezaten ahalik eta lasterren:
   • Gerratik eta intolerantziatik ihesean datozen pertsonak erabateko bermeaz hartzeko konpromisorik eta elkartasunik handienak har ditzatela.
   • Beraien artean, nazioarteko erakundeekin, Europako erakundeekin eta herritarren elkarte eta erakundeekin koordina ditzatela pertsona horien egoera etsia arintzeko hartu beharreko salbuespenezko jarduerak, erabateko eraginkortasunezko jarduera bateratuak abiarazteko.
   • Nazioarteko eta Europako erakundeei, bai eta beste estatu batzuei ere, eska diezaietela politika komunak gara ditzaten berehala, iheslarien jatorrizko estatuetan sortu diren arazoak arintzen eraginkorki laguntzeko xedez, horiexek baitira migrazio-krisia eragin dutenak.
5. Eskerrik beroena erakuts diezaietela gizarteko hainbat sektore burutzen ari diren elkartasunezko ekimen ugariei, eta, aldi berean, anima ditzatela gizartea oro har, eta enpresa taldeak eta baliabide gehien dituzten horiek batez ere, ahal duten neurrian lagun dezaten, modu koordinatuan, herritarren talde horiek dituzten beharrizan izugarri eta premiazkoei arreta ematen; ostatu, osasun eta elikadura eremuetan bereziki.