Partekatu edukia
Nafarroako Pertsona Gorren Elkarteak (ASORNA) irisgarritasun handiagoa eskatu zuen administrazio publikoekiko izapideetan, Patxi Verarekin izandako bileran. Elkartearen egoitzan egin zen bilera, eta Arartekoa gizarte-erakundeekin egiten ari den harreman-errondan kokatzen da.
ASORNA 1957an jaio zen, pertsona gorren berdintasunaren alde borrokatzeko eta haien aniztasuna, gizartean duten espazioa, eskubideak, berezko hizkuntza eta kultura aldarrikatzeko. Besteak beste, hezkuntza-laguntza, aisialdiko jarduerak, bitartekaritza-zerbitzuak eta gizarte-arreta eskaintzen ditu.
Arartekoari jakinarazi ziotenez, oraindik asko dago egiteko zeinu-hizkuntzaren esparruan; izan ere, 27/2007 Legeak Espainiako zeinu-hizkuntzak ikasteko, ezagutzeko eta erabiltzeko eskubidea aitortzen duen arren, Nafarroan ez dago horien erabilera arautzen duen araudirik.
Nafarroako administrazio publikoekiko harremanetan irisgarritasuna bermatzeko, Elkarteak SVisual plataforma erabiltzea eskatzen du. Plataforma hori 24 orduz dago eskuragarri, ASORNAk kontratatutako langileei esker. Bereziki, osasun-zentroetan eta larrialdi-zerbitzuetan zerbitzu hori erabiltzea eskatzen dute.
Topaketan aztertu ziren beste gai batzuk izan ziren ASORNAk eskaintzen dituen zeinu-hizkuntzako doako ikastaroetara joaten diren boluntarioen falta eta pertsona gorrik ahulenen egoera (familiaren laguntzarik gabe, migratzaileak, adinekoak...).
Bileran izan ziren, ASORNAren aldetik, Sofía de Esteban presidentea, Nahiara Huici gizarte-langilea eta Lucía Burguete interpretea. Arartekoaren aldetik, Patxi Vera titularra eta Susana Galilea kabineteburua bertaratu ziren.
Partekatu edukia