Partekatu edukia
Nafarroako Arartekoak, Patxi Verak, Osasun Departamentuari formulatu zaizkion gomendio, iradokizun eta legezko betebeharren oroigarri nagusiei buruzko txosten berezia eman dio gaur goizean Nafarroako Parlamentuko lehendakariari.
Txosten hau joan den urrian eskatu zen, Nafarroako Parlamentuko Bozeramaileen Batzordearen erabakiaren bidez, Osasunari buruzko Foru Lege berri baten proiektuaren tramitazioaren testuinguruan. Jaulki den agiri honen xedea erakundeak Osasun Sailari zuzendutako jarrera eta iritzi nagusiak ezagutzea da, legegintza-proiektua izapidetzean kontuan har daitezen.
Gaur eman den txostenean ebazpenen hautaketa bat jasotzen da, alde batetik, arau-iradokizunak biltzen dituztenak (zentzu zorrotzagoan, mugatuagoan edo murriztuagoan era zuzenagoan eta berehalakoagoan legerian egon daitezkeen "hutsuneak" daudela adierazten duten erabakiak), baina baita beste ebazpen batzuk ere (oroigarriak, gomendioak edo iradokizunak), legegileak neurri edo intentsitate handiagoan edo txikiagoan azter ditzakeen gai orokorrak eragiten dituztenak.
Nolanahi ere, erakundearen erabakiak dira, eta, osorik edo zati batean, kasuan kasuko kexak aurkeztu zituzten pertsonen kasu zehatzak gainditzen dituzte eta agerian uzten dituzte interes publikoko edo orokorreko problematikak, horiei aurre egiteko lege-neurriak har litezkeelako.
Txostenaren egiturari dagokionez, lehenengo eta behin pertsona eta kolektibo ahulenen eta zaurgarrienen eskubideak bermatzeko jaulkitako erabakiak aurkezten dira, eta baita osasun-sistemarako sarbidean agintzen duen eta erakunde honen zereginean garrantzi kualitatibo eta kuantitatibo berezia duen ekitate-printzipioa bermatzekoak ere, eta, ondoren, oro har herritarren eskubideak bermatzeko hartutako erabakiak azaltzen dira.
Txostenean covid-19aren pandemiari lotuta dauden gai espezifikoei buruzko adierazpenak eta erabakiak ez sartzea erabaki da, salbuespenezko egoera batean emititu zirelako eta, funtsean, administrazio-kudeaketari eta egoera berezi horretan herritarren eskubideei lotuta daudelako, txostenaren eskaerarekin lortu nahi den helburu zehatzerako balio txikiagoa dutela iritzita.
Dokumentuaren azken zatian, halaber, Estatuko eta autonomia-erkidegoetako defentsa-erakunde guztiekin partekatu diren eta Nafarroako erakundearen parte-hartze aktiboa izan duten osasunaren arloko bi lan monografiko aipatzen dira: bata, ospitaleetako larrialdiei buruzkoa, eta bestea, landa-inguruneko osasunari buruzkoa.
Nafarroako Arartekoaren ustez txostenaren edukia lagungarria izango da talde parlamentarioek herritarrek egunero osasun-arretaren arloan dituzten arazoei buruzko informazio osatuagoa izan dezaten. Era berean, legedia pertsonen egungo benetako beharretara egokitu ahal izateko nahia adierazi du.
Beste alde batetik, Unai Hualdek nabarmendu duenez, "txosten hau Gobernuaren 2025erako araugintza-planean aurreikusi den Osasunari buruzko Foru Lege berriaren tramitazioan zehar talde parlamentarioen lana aberasteko tresna baliagarria izatea espero du".
Partekatu edukia